Gujarat BJP hruaitu, Bhupendra Patel chu a vawi hnih nan chief minister atan Thawhtanni khan lak luh a ni a. Gandhinagar-a inkhawmah hian Prime Minister Narendra Modi, Union Home Minister Amit Shah leh central minister eng emaw zat an tel.
Patel-a hian nikum September khan Vijay Rupani thlakin chief minister atan lak luh a lo ni tawh a. Tun tumah hian Governor Acharya Devvrat chuan Secretariat thar bulah rinawmna thu tiamtirin a la lut a ni.
Minister atan mi 16 lak luh nghal an ni bawk a, an zinga pariat hi cabinet tur an ni a. Mi 11 chu sorkar liam ta chiaha minister lo ni tawhte tho an ni.
Cabinet minister turte hi Kanu Desai, Rishikesh Patel, Raghvji Patel, Balvantsinh Rajput, Kunvarji Bavaliya, Mulu Bera, Kuber Dindor leh Bhanuben Babariya te an ni.
Harsh Sanghvi leh Jagdish Vishwakarma chu minister of state (independent charge) atan lak luh an ni thung.
Ministers of state atan hian Parshottam Solanki, Bachu Khabad, Mukesh Patel, Praful Pansheriya, Kuverji Halpati leh Bhikhusinh Parmar te lak luh an ni bawk.
Gujarat sorkar thar lak luh inkhawmah hian a bik taka sawm sadhu 200 an tel bawk.
Other Backward Class, Scheduled Caste leh Tribes leh hmeichhia pawh an tel nual a. Hengho hi kum 2024 Lok Sabha leh 2026 state assembly inthlan huna an vote hmuhna hnar tura ngaih an ni.
BJP han Gujarat-ah thuneihna an chang rei tawh hle a, tun tum inthlanah hian bial 182 awmah bial 156 zetah hnehna an chang leh a, vote tla zawng zawng zinga 53% an chang pha bawk a. Khawthlang lam state-ah hian a zawna vawi sarih nan an sorkar leh ta a ni.
Kum 60 mi, Patel-a leh a cabinet pum chu sorkar thar dinna tur kawng hawn nan Zirtawpni khan an bâng a. Inrinni khan BJP legislative party hruaitu atan thlan zui niin governor a hmu a, sorkar a siam theih thu thlenin Thawhtanniah lak luh a ni ta a ni.