- Mahmuaka Chhakchhuak
Lal Isua piang kha lawmpuitu mi tlemte chauh kan hria a nih kha, nimahsela a lo pian avang erawh chuan khawvel a buai a, a kum rualpui engemawzatin nunna an chan phah zawk kha hriatthiam a har a sin! Enge a chhan ni ang le?
A hma kum 400 vel daih tawh khan he Nausen lo piang tur hi hrilhlawk a niin a awmdan tur leh a thiltih tur engkim hrilhlawk a ni a, chutiang ang chuan a ni chuan rawn ti dik zelin a hun tawp ber thlengin a zawma. A lo pian hunlaia khawvel buaina pawh chu thleng tur reng a ni a, a chhan chu Van-mi a nih tlat vang a ni. Khawvela a hmangaihte’n nun an neih nan Nun hlan turin a rawn kal a, natna an tawrh ai tuar turin amah a rawn inpe a, an thih aia thi turin a nun a rawn hlan ta a ni.
Lal Isua min hmangaihna hi teh phak rual a ni lo a, chhiar theih pawh a ni lo a, hriat thiam phak pawh a ni hek lo. Zir zawh sen pawh a ni chuang lo a, a thuk em em a, a sang em em bawk a, a zau em em bawk a ni. Chu chu Thuthlung Hlui hun atang tawhin zawlnei ten min lo hrilh tawh a, fiah lo ruaiin kan hria a, a damlai hunah famkim lo takin kan hria a, a thih meuh erawh chuan fiah takin kan lo hre ta a ni. Chumi hrefiaha, hre famkim tur erawh chuan Thlaraua tihvar erawh kan mamawh thung si.
Chumi hrelo chuan keini erawhin thawmhnaw thar neih kan tum a, kan theih ang angin mita mawi turin cheimawi kan uar bawk a nih hi. Chhungkaw tinin hlim taka hman kan tum a, naupangte lahin hun danga an tih ngai hauh lohin dawhthlak dawh ngei an lo tum bawk a, kohhrante lah chuan vawi hnih nge vawi khat ruai kan theh ang? tiin ruai theh dan kan lo ngaihtuah bawk a, tlangval thenkhatte lah chuan zu leh sa nena hman tumin a hma atangin an lo hmanhlel bawk a, sumdawng mite lahin hemi hun atan hian anlo inla khawl bawk. Kristmas tak tak hi kan thelh deuh lawng maw?
Krista rilru ah chuan nun nei lo ten nun an neih nan a theihna mai pawh niloin a nun hial rawn hlan a ngam a, a hlan reng bawk a, chumi hrerenga hlen ngei turin chuan Mari chhul a rawn hmang a, Bethlehem bawnginah ( a pianna hi bawngin chu a ni chiah lo nain, bawngin angin kan ngai tawh si a) a rawn piang a, Khawchhak lam atanga rawn kal mifingte pawhin an neih thil hlu an rawn hlan a nih kha. Josepha fapa nih mai kha a ropui lo a, kan hriat rengna pawh a ni hek lo. A hmaa a tihtur hautak tak avang chuan chu nausen rawn piang chu a lawmawm a, lawm a phu a, thilpek hlu tak pek kha a phu hliah hliah a ni. Chumi hrereng chuan keini pawh hian he hun hi midang tan hmang ila, kohhrante ngei pawh hian ruai atan kan sum hi hmang lo hian khawilai hmun emawa kan unau harsa tak tak zawkte tan sum leh pai hi hmang ta zawk ila, Chhungkaw tinte pawh hian mas thawmhnaw leh kan in cheimawina atana sum kan hman thin hi keini aia harsa zawkte tan thehchhuak ta zawk ila a mas bik zawk lawng maw?
Krista an kan tum a, kan inzirtir bawk a, hetiang hun ah takte hian Krista rilru ang pu ila, Krista angin midang tan nun hmang ila, mahniin duhtawk ngah hnua midang tana in phal chauh niloin mahni tana kan tih kha midang tan hlan ta zawk ila, kan Sa ei ai te hi hlanin sa ei lo ngam ta zawk ila Krista rilru ang pu kan ni zawk ngei ang. Chutah ngei chuan Krista chu a takin kan hre tawh anga, khawvela a rawn kal chhan chu thlarau atanga hria ni mai loin thinlung pawh niloin tisa ngeiin kan hre tawh ngei ang. Hmangaihna avanga a retheihna chu kan hre tawh anga, Krista anna ah kan thanglian tawh zawk ngei ang.
Chu ngei chu a ni – Kristmas tak tak chu.