Inrinni zinga an inkhelhin boruak a sang a, sawi zui turin team pahnihte inkhel zawhah an inbakkaih. Tun tumah erawh chak ngei tumin rilru fimin an inkhel a, boruak so sang lo mahse overtime khelh ngai a inumin New Orleans Pelicans in 129-124 in Phoenix Suns an hneh.
Thawhtanni zinga New Orleans a Smoothie King Center-ah team naupang tak ni chunga talent nei tha rual awmna Pelicans tan star player Zion Williamson bawk a che leh a. Match zawna point 35 a score-na niin an team a chakpui.
Hun pangngaiah team pahnihte 117-117 in an intluk a. Suns guard Chris Paul chuan second 2.8 a la awmin bucket pawimawh tak la in overtime a team a hruai thleng.
Nimahsela Pelicans in over-time-ah point 14 an score theih chu an chakpui a. Vawi 18 an chakna niin Western Conference-ah an sang ber.
Kum 22 mi Pelicans palian Williamson-a’n a thahrui ngah leh pumraw lian a ni chunga ball a khawih thiam chu a larpui a. NBA-a a luh hnuah shooting-ah hma a sawn tih lantir bawkin an mamawh hunah point pawimawh a score thei hle.
CJ McCollum chuan point 29 score bawkin a thlawp a. Pelicans offense a kaltluang thin viau laiin Suns in point score lamah chatlak an nei ngun.
Suns in star guard Devin Booker an chhawr thei lova. An tan Deandre Ayton chuan point 28 score in Mikal Bridges chuan 27 a thawh.
Williamson chuan, “Suns hi team tha tak an ni a, fak an hlawhte hi an phu. Chuvangin an laka a zawna kan chak thei hi kan tana inrintawkna lian tak siamtu tur a ni.” tiin a sawi.
Inkhel dangah Los Angeles Lakers chuan a zawna match ruk inkhel tura an zinchhuahnaah hnehna an chang a. Detroit Pistons lakah 124-117 in an chak.
Lakers tan Austin Reaves chuan second 12.1 a la awmin inkhel dahthatna 3 points a lut a. Star player LeBron James leh Anthony Davis ten point 35 leh 34 an score ve bawk.