Afghan Taliban sipaite chuan sipaiten Pakistan-a civil mi paruk thatin mi dang 17 vel an hliam bawk niin Pakistan chuan a sawi.
Hei hi Pathiannia ramri khuaa thleng a ni a, bomb hmang bakah silaia inkahna nasa tak a thleng tih an sawi.
Chaman-a thil thleng hi Pakistan sipaite chuan demin Afghan lam hian ‘tum bik nei lovin silai an kap’ niin an sawi.
Pakistan sipaite pawhin an chhang let a, Afghan sipai pakhat a thi ve bawk.
Engvanga ramri kânna pui ber pakhatah hian buaina hi chhuak nge tih hriat mai theih a la ni lo.
Ram pahnihte hi nikuma Afghanistan-a Taliban-in thuneihna an chan leh hnuah venhimna chungchangah inmil lohna neiin an boruak pawh a sang hret hret zel.
Pakistan Prime Minister Shehbaz Sharif chuan Afghanistan chet dan chuan ‘na thei ang bera dem’ a phu tih a sawi.
Afghan venhim hna thawktute chuan Pakistan hian Afghan ramri vengtuten an ram chhunga checkpost an sak chu tawpsan tura an tih atanga buaina hi chhuak niin an sawi tih Reuters news agency chuan a tar lang.
Hetih lai hian AFP news agency chuan Afghan sorkar hotu pakhat chuan Afghan sipaite hian ramri hungna thenkhat paih/thiah an tumna atanga chhuak zawk niin a tar lang.
Kum 2017 atang khan Pakistan hian ramri hungna hi tha takin a siam tan a, hmun thenkhata hungna chu Taliban hian an duh lo va, an hma chiaha Afghan sorkar pawh khan a duh lo bawk.
Pathiannia thil thleng thlalak thehdarhah chuan mite chu laipui kahna avangin an hliam tih a hmuh theih a, lirthei leh kawngpui chhiate pawh a lang.
“Mortar a lo tla a, mei nasa takin a siam a. A hnuah engmah ka hre zui ta lo,” tiin damdawi ina awm pakhat chuan Al Jazeera a hrilh.
Kandahar governor pawhin Taliban member a thih thu leh mi dang 10-in hliam an tawrh thu a sawi.
Inkahna a thlen hnuah hian ramri kânna chu khar nghal a ni a; mahse, thuneitute chuan ram pahnih aiawhte an inbiak hnuah Pathianni chawhnuah hawn lehnghal a ni tih an sawi.