Rome khawpuia cafe-a mipa pakhatin silai a hmeh puahnaah hmeichhia pathum an thi a, an zinga pakhat phei chu Italy prime minister thar thiannu a ni.
Cafe chhunga thahte hi tual chhunga block’s residents’ committee thukhawmte an ni.
Rome Mayor Roberto Gualtieri chuan inkahna thlengin chu ‘tharum thawhna thlanmual’ tia sawiin Thawhtanniah emergency meeting a ko nghal.
Silai hmet puaktua puh, kum 57 chu man nghal a ni a. Tun hmain committee-a board nen intihthiam lohna an lo nei tawh nia sawi a ni.
Committee-a vice-president, Luciana Ciorba pawh Fidene district-a cafe-a silai kah a nih lai hian a awm ve niin Italy-a La Repubblica chanchinbu chuan a tar lang.
Silai keng hi Pathianni khan bar-ah lutin, “Ka that vek dawn che u,” tia au hmasain a pistol a lek chhuak zui a. Police-in an man hma hian lo awm ve dangten an man bet zui ta a ni.
Hliam tuar hmeichhia leh mipa pahnih ve ve an awm a, pakhat chu a dinhmun a tha vak lo.
Prime Minister Giorgia Meloni-i chuan thah zinga pakhat, Nicoletta Golisano-i chu a thiannu a nih thu a sawi a. Mi dang hi Elisabetta Silenzi leh Sabina Sperandio te an ni.
Facebook-ah Golisano-i chhungte a tawrhpui thu Meloni-i chuan a tar lang a, ‘hmeltha leh hlim thei tak’ tiin a thiannu chu a hriat reng tawh tur thu a tar lang tel.
“Nicoletta-i hi fate ngaihtuah tak, thil tih apiang ti tak tak leh thian rinawm a ni a, hmeichhe khauh tak a ni a, a chang erawh chuan nunnem tak a ni bawk,” a ti.
“Heng zawng zawng bakah hian a tih tur china professional taka tih thin a ni a, Nicoletta-i hi ka thian a ni,” a ti.
“Hetianga a thih hi a hun lo,” a ti a. “Nicoletta-i hi a hlim thei a, a hmel a tha a, chawlhkar tam pawh la liam lovah a piancham vawi 50-na pualin kawr sen mawi tak leiin a inbel a. Ka tan chuan khatiang khan a hmelthain a hlim thei reng dawn a ni,” a ti bawk.
Meloni-i chuan mi kaptuin silai a ruk chhuahna nia sawi, silai kahna hmun (shooting range) chu khar nghal a nih thu leh chhui zui mek a nih thu a sawi.
Police chuan mi thattuin a tih chhan engmah an la sawi lo va, Italian chanchinbute chuan a hming an saksak a, a hming tak erawh puan a la ni lo va. Politics zawnga thil thleng kaih herna pawh a la awm lo.
Mi kaptu leh apartment block’s board hi hun eng emaw lai khan an intithiam lo nasa hle nia sawi a ni.
Prime Minister Meloni-i hi Italy-a far-right Brothers of Italy party hruaitu niin October thla khan an rama hmeichhe prime hmasa ber atan lak luh a ni.