Spanish football club Atletico Madrid chuan January thla a player hralh chhuah ni thei tura an zawrh zingah Portuguese star Joao Felix chu a tel.
Atletico hian an club sum dinhmun tih that nan player pathum atanga panga inkar vel chhuahtir tumin thil an kalpui mek a. First team player zingah Felix bakah Matheus Cunha, Felipe leh Mario Hermoso te chhuahtir an phal.
La Liga club sum dinhmun hi UEFA Champions League group stage an pelh theih loh in a nghawng a. Europa League-ah pawh an lan phak dawn loh bawk avangin an tan sum luhna tur dap a ngai.
League-ah pangana an ni mek a, hmun thenkhatah Atletico hian January thla hian first team player palite hi an man tura an beisei anga an hralh theih chuan, season tharah UEFA Champions League khel tura an tlin bawk chuan an sum dinhmun chu a pangngai leh dawn niin an sawi.
Felix hian kum 2019 July thla khan beiseina sang tak nen Benfica atangin Euro maktaduai 127 in Atletico Madrid hi a zawm a. A hunlaia rawlthar ngaihven hlawh ber zing ami niin Antoine Griezmann thlaktu atan an lalut.
Kum 23 mi hian Wanda Metropolitano a hun a hman chhungin vawi 129 inkhelin goal 33 a khung bakah midang khung tur vawi 18 a siam a. Chetthat chang nei mahse beisei anga hun a hman loh avangin Euro maktaduai 100 vela hralh an pawi ti lo.