India inpumkhatna kawng zawh, Bharat Jodo Yatra a huaihawt mekin ni 100 a tlinna chu Congress chuan Rajasthan khawpui, Jaipur-ah concert huaihawtin a lawm dawn a. Zaithiam Sunidhi Chauhan pawh a inlan dawn tih AICC General Secretary Jairam Ramesh chuan Thawhlehni khan a sawi.
Yatra hi September 7 khan Kanyakumari atanga bultanin Tamil Nadu, Kerala, Andhra Pradesh, Karnataka, Telangana, Maharashtra leh Madhya Pradesh an suartluan tawh a. February, 2023-ah Jammu & Kashmir-ah an khar ang.
‘Bharat Jodo Concert’-ah hian Congress hruaitu lawk tak tak an tel dawn a. Kawng zawha an khaipa ber, Rahul Gandhi pawhin chawhnu dar 1:00-ah Dausa-ah thuthar lakhawmtute a kawm ang.
“Bharat Jodo Yatra-in December 16 hian ni 100 a tling dawn a, mellung pawimawh tak a ni,” tiin Ramesh chuan thuthar lakhawmtute hnenah a sawi.
Alwar-ah December 19 hian vantlang inkhawm lian tak huaihawt an tum tih a sawi bawk.
Thuthar lakhawmtuten Zirtawpnia Line of Actual Control hrul, Tawang, Arunachal Pradesh-a Indian leh Chinese sipaite intihbuaina chungchang an zawh chu a sawi zui duh lo thung.
Defence Minister Rajnath Singh-a’n Parliament-ah a sawi tawh a, sawi zui a tul rih lo tih a sawi.
Gandhi-a chuan Thawhlehni khan Dalit activist 30 dawn, pawl hrang hrang aiawhte a kawm tih Ramesh-a hian a sawi a. Thawhtanni khan hmeichhe pawl aiawhte a hmu tawh bawk tih a sawi.
Union minister hlui, Namonarain Meena chuan yatra-ah hian an thlen chin apiangah miin an lo dawngsawng tha hle zel tih a sawi a, Prime Minister Narendra Modi-a dawt sawite hai lan a nih thu a sawi.