Aizawl: Congress party chuan Rajya Sabha thutkhawmah Uniform Civil Code (UCC) in India Bill, 2020 pharh remtih a ni ta chu pawi an tih thu an sawi a. BJP rorelna hnuaiah India rama hnam tenau zawkte, Mizo hnam leh Kristianna dinhmun thlengin a derthawng zel niin an sawi.
Nimina an thuchhuahah, “India ramah hnam leh sakhaw hrang hrang awmin, hnam zia azirin hnam dan (customary law) pawh a awm hrang thliah a, heng kalphung fel tak a neihte hi UCC chuan nuai bo veka India ram pumah dan pakhat, inang tlang vek hmantir a tumna chu BJP-in Hindu lal ram siam a tumna kal zel a ni,” an ti.
Congress party chuan UCC hi house-a put luh tumin vawi eng emaw zat BJP hian an lo bei tawh thin a, Congress party leh opposition party dangten an dodal nasat em avangin an hlawhchham zel a, tunah hian private member bill angin an pu lut lui ta tih sawiin, Rajya Sabha MP K Vanlelvena chu he dan pharh chungchanga vote lak a nih laia a awm ve lo chu hriatthiam harsa an tih thu an sawi.
“December 9 chawhnu dar 2:30 leh dar 5:00 inkarah private member bill, ‘The Uniform Civil Code in India Bill, 2020’ hi sawiho hmasak ber tur a ni tih a hma ni hnih, December 6-a List of Business tihchhuahah chiang taka tar lan a nih tawh avangin MP Pu K. Vanlalvena hian a hre lawk vek a ni. Chuvangin, hre lawk vek chunga UCC dodal tura house-a a awm lo lui hi Mizoram Kristiante tan pawm theih a ni lo a, Kristian sakhua leh Mizorama hnam hrang hrangte phatsanna dik tak a ni,” an ti.
Congress chuan hnam leh sakhaw kalphungte humhim turin UCC hi nasa taka dodal a ngai tih an sawi a. Dan puitlinga siam a nih hma ngeiin kohhran leh NGO-te, political party zawng zawngte pawh hnam leh sakhaw himna tura theihtawpa UCC dodala tangrual tura sawmin, MNF party pawhin central lama an thawhpui BJP rorel tum dan hi nasa taka dodal ngam tura an phut thu an sawi bawk.