Italian Formula 1 team Scuderia Ferrari chuan an team principal thar atan Frederic Vasseur an lalut.
Kum 54 mi ni tawh French pa Vasseur hi Alfa Romeo/Sauber team hotupa a ni a. January 9 atangin Ferrari hi a enkawl tan dawn a, Mattia Binotto a thlak ang.
Ferrari hian thla hmasa khan kum 53 mi Binotto hian an team a chhuahsan tih an sawi a. Italian engineer hian kum 1995 khan an team hi zawm a, team hotupa ni turin a kal chho zel a ni.
Chiang zawkin
Tun season liamta khan Ferrari hi Binotto hovin car tha tak mai an nei a, nimahsela beisei angin season an hmang lo. Season tluan a an car tihchak kawngah bakah car rintlakna zawnah te midang an tluk lova. Hei chauh hi ni lovin team leh mimal thutlukna siam sual an ngah bawk.
Hei vang hian team in insiksawi ngai an ti a, Vasseur hi world champion nih an tumna kawngah an lalut ta a ni.
Ferrari chief executive officer Benedetto Vigna chuan, “Motorsport a a tel chhung zawngin Fred hian engineer a nihna anga thiamna a neihte hi a team enkawl lai leh a hnuaia driver awmte lak atanga theihna sang tak han cho chhuah nen a thiam hle a. Hetianga kaihruaitu leh inenkawlna hi Ferrari in hmalam kan panna turah kan mamawh a ni.” tiin a sawi.
Vasseur hi Ferrari driver Charles Leclerc chhertu zing ami niin tam takin an ngai bawk a. Kum 2016 khan GP3-ah leh kum 2017 a Formula 2-ah te a hnuaiah Leclerc hi a lo champion tawh a. Kum 2018 khan Sauber a enkawl laiin Formula 1-ah Leclerc hi a lalut bawk.
Eng tin zel?
Vasseur-a hmunruak kalsan tak hi McLaren team principal thin Andreas Seidl chuan a luah dawn a. January-ah ani pawhin a team thar hi a zawm ang.
Kum 46 mi German mi Seidl hian McLaren hi Thawhlehni khan a chhuahsan thu puan a ni a. Sauber in Audi nen kum 2026 atanga an thawhdunna tur thlirlawkin ruahmanna an kalpui tan.
Hetihlai hian McLaren-ah hian kum 2019 atanga an executive racing director ni tawh Andrea Stella chu team principal a ni ve thung ang.