Khawchhak lam atangin dan lovin kuhva rah a rawn lut nitin a, ngaimawh sateh mah ila sorkar berin mit siai chungin min ensak mai mai bawk si. A hlawkpuia te erawh chu an lian thur thur a, kawng tam takin milian sa an len belh niin a hriat bawk.
Veitu leh ngaimawhtu an awm reng chungin a rawn lut nitin tho a, hmalak a har a ni ang e. Hetih lai hian kan ramchhung ngei atanga kan tharchhuah kuhva erawh a hnawng a, kuhva huan siama eizawngtu tam takin a hralhna kawngah harsatna an nei thung.
Hetiang a nih avang hian Hachhek tlangdunga kuhva chingtute pawh an mangang a, an kuhva rah tharte chu sorkar in certified-sak thlap se an duh thu an sawi ta hial.
Hachhek Bial Kuhva Chingtu Pawl (HBKCP) Asst Secretary Kanan Lalhlimawma chuan Assam sorkarin Myanmar atanga kuhva lak luh khapa an dan meknaah an kuhva thar chhuahte pawh dan ve a nih phah tih a sawi a, tunah hian an kuhva leitu hnam dangten Assam lamah an phur thla thei lo a, kuhva rah ro tam tak a tawih chhiat phah tawh tih a sawi.
Heti a nih chuan kan ram ngei atanga kuhva tharchhuaktute pawhin harsatna nasa tak an tawh phah tih a chiang reng mai a, Aizawl tlang atanga lo rel felpui a, khawchhak kuhva laka mit lo siai ngawt hi a tawk lo hle tih hriatthar a tha hle. Kan ram atanga tharchhuahte certified sak dan hi awm ngei bawk teh se.