Simeon Rongphar-a kaihhruai Karbi Students’ Association (KSA) chuan Assam-Nagaland ramri buai chungchanga pawl pathumte inbiak neih an phut a, inbiakna a hlawhtling lo a nih chuan Nagaland châk lakna kawngpui chu danchah an tum.
Zirlai pawl hian Assam-Nagaland ramri chungchangah hian Assam leh Nagaland sorkar aiawh leh Karbi Anglong Autonomous Council (KAAC) te chu inbiakna neih an phut.
Diphu-a thuthar lakhawmtute an kawmnaah Karbi Students’ Association president Rongphar chuan inbiakna hi a awm lo a nih chuan karleh Zirtawpniah darkar li chhung economic blockade an huaihawt dawn tih a sawi.
“Daldali Reserve Forest-ah Dimapur district thuneitute hriatpuina thlapin lehlam hian chet an rawn la,” a ti.
“Hetianga kan state dainaa a bultumtute hi Lotha leh Tangkhul hnam (tribe) an ni a. Heng mite hian ramri lungphun (border pillar) No. 1 leh No. 3 pawh an phawi daih a. Heng lai ram hi Nagaland state ta reserve forest huam chhung niin an sawi,” a ti bawk.
Nagaland hi an state ramri piah lam daitute hnenah hian land patta an pe nia sawi a ni bawk.
KSA hian Naga-ten Assam ram chhung an dai leh an ta neih chungchangah hian Nagaland chief minister chu an dem thu an sawi bawk.
Karbi zirlai pawl hruaitu hian Nagaland mipuiin Dimapur district thuneitute chet dan hi an thlawp a, Daldali Reserve Forest ram chu chan an tum hle niin a puh bawk.
October thla khan Nagaland atang hian Assam ram chin nia hriat ramngaw chu daia luahtu an awm nia sawi a ni.