PC party Sr. Vice President Lalrinzuala Chawngthu-in Mizoramah chuan Uniform civil code kan hmang ve tur a ni lo, a ti a. India ram rorelna in sànga pawm tak Uniform civil code (UCC) chu PC party chuan Mizorama hman an rem ti ngai dawn lo tih a sawi.
Lalrinzuala Chawngthu chuan dodalna nasa tak kara UCC pass a ni chu pawi an tih thu a sawi a. UCC chu India ram pum tan a him lo hle nia sawiin, “UCC hi India ram puma hman tura duana pass ni tawh mahse, India danpui article 371G-a special provision kan neih avangin Mizoramah hmang lo turin kan ti thei” a ti.
Article 371G chu kum 1986-a India danpui siamṭhat vawi 53-naah Mizoram bik tan India danpuia telh a nih thu Lalrinzuala chuan a sawi a. “Mizote sakhua leh khawtlang nunphungah te, kan customary law hman thu-ah te, kan customary law hnuaia inawpna leh rorelna kan kalpui danah te leh kan leilung mida- ng kuta hlan chungchangah te Mizoram state assembly remtihna tello chuan Mizorama hman theih a nih loh tur thu a chuang a ni,” a ti.
PC Sr. Vice President chuan, “UCC hian hengte hi a ṭhiah theih dawn avangin Mizorama hman ve kan duh lova. India danpui hnuaia inziahluh remtih avanga inremna ziaktu, zalenna suala rammu tawhte sorkarna chelh lai tak a ni hi Mizoram sorkar tan hmalak a remchang hle a ni” a ti a. “UCC chu India ram puma hman tura tih a nih hun a thleng a nih pawhin India danpui hnuaia humhalh bik kan nihna lai ṭanchhana Mizorama hmang ve lo tura sorkarin na taka hma a lak ngei kan beisei tlat a ni” a ti bawk.