Aizawl : Mizoram Secondary School Games vawi 39-na chu nimin khan Serchhip Sports stadium-ah Dy Speaker Er. Lalrinawma’n a hawng a. Tunlaiah infiamna huang hrang hrangte eizawnna a tling deuh vek tawh tih sawiin, hetiang lama theihna nei leh tuina neite tan kawng zau takin a inhawng tih a sawi.
Infiamna lama theihna neite zawnchhuahna buatsaih thiam pawh a pawimawh thu Er Lalrinawma chuan a sawi a. Infiamnain taksa leh rilru hriselna a kentel avangin uluk leh duat taka taksa enkawl a tul zia zirchhuak tela, hriselna ngaipawimawh deuh deuh tua chahin, “kan thalaite in hrisel chuan he ram hi a hrisel tihna a ni” a ti.
Zirlaite chu Mizoramin hmasawnna duhawm a neih zel theih na tura enkawltu ni tura rilru leh taksa vawng tha zel turin Er Lalrinawma chuan zirlaite chu a sawm bawk.
Mizoram secondary school games-ah hian Aizawl district North leh South-a then te bakah district dang sawm, an vaia district sawmpahnihte aiawhin Secondary school te an tel a, Athletics item hrang hrang panga bakah, Badminton, Table Tennis, Volleyball leh Football hmangin zirlai 630 te an inel ang.