Aizawl: Vairengte Kuhva Ching Cooperative Society chu vawiin chawhma hian Multipurpose Hall-ah General Body meeting an nei dawn a. He hunah an member zawng zawngte chu kal vek tur a hriattirin an kuhva tharte hralhnaa harsatna an tawh chungchangah hmalak dan turte an sawiho dawn nia thudawn a ni.
Kuhva ching society hian thla hmasa khan meeting nei tawhin November, 2022 thleng sorkar hmalakna ngaichangin sorkar atanga hmalakna mumal a awm tak loh avangin a tul dan anga hmalak an tum tawh a. Member thenkhat chuan kuhva hring hralh kawnga harsatna thlentu, Burma kuhva rah ro sumdawnna chu na zawk a dodal an duh tawh niin thudawnna hian a sawi.
Hetihlai hian Bilkhawthlira kuhva chingtute pawhin dan loa Burma kuhva lut nasa lutuk avanga an thar hralhna kawnga harsatna nasa tak an tawh avangin vawiin atangin Burma atanga lo lut kuhva ro phur lirtheiten an area a paltlang loh nan leh dangchat turin chhun zan zawma duty an tan dawn.
Tar lan tawh thin angin Burma kuhva rawn lut nasa avang hian Assam lam chuan Mizo thar ngei kuhva hring pawh kaltlangtir an phal loh avangin, kuhva lei tawhte pawhin an kuhva leite phai lamah an keng thla thei lo a, hei vang hian kuhva la hralh lote pawhin hralhna kawngah harsatna an tawk mek a ni.
Bilkhawthlira kuhva chingtute hian khaw chhung hmun hnih, Chemphai peng leh Buhchang pengah gate siama duty an tum a, vawiin hian duty pahin a tul angte buatsaihin an hnatlang dawn a. Hemi rual hian Bilkhawthlir ram chhunga kudam awmte pawh an enfiah nghal dawn a ni.