Boston Celtics in second half-ah point 20 a hma an hruaina an humhim zo lova. Anmahni zawk point 13 a an hniam hnuah ‘comeback’ a ngai. A tawpah mualpho lo turin overtime-ah an chak thei hram a, 122-118 in Los Angeles Lakers an hneh.
Los Angeles a crypto.com Arena ah Celtics tan Jayson Tatum chuan point 44 a score a, Jaylen Brown chuan point 25 score in heng zinga point nga hi overtime-ah a ni a, an chak nan a pawimawh.
NBA a record nei tha ber ni lai Celtics tan Marcus Smart pawh inkhel pawimawhah a tangkai leh viau a. Point 18 score in 3 pointer vawi li a luh an chhawr.
Boston hi a zawna vawi hnih tlawm lai an ni a, mahse a vawi thum nan tlawm nawn lo turin an tho thei hram a. Tun season-ah vawi hnih aia tlawm zawn rei an la nei lo.
NBA team hlawhtling ber pahnih inkhelah Lakers in 81-61 a hniam zawk an nih hnuah point 12 chauh Celtics in an score chhungin 45 an score hman a, an thawhlehna ropui viau mahse overtime-ah an tang tlang thei lo.
Lakers tan Anthony Davis chuan point 37 leh rebound 12 a la a. Mahse second 28 a la awm a free throw vawi hnih a luh loh chu a pawi a, chak theihna hun an neihah a team a chakpui thei lo. LeBron James chuan point 33 a score ve bawk.