- Ruata
Tuna flex fuel hmang Wagon R an phochhuah hi a duan chhinna ‘prototype’ a ni rih a. A chhuah hun tak tur erawh chu sawichian theih a la ni lo a, tunah chuan BS6 pangngai sorkar pawhin a la pawm rih avangin harsatna a la awm lutuk lo a, Maruti Suzuki hi an lo inhmakhua lawk a ni ber a, lei theih tura tlangzarh erawh tunhnai mai chu a la nih hmel loh a ni.
Flex fuel?
Flex fuel hi tarlan tawh angin petrol pangngai aia a khu siam chhuah fai tha zawk a ni a. Ethanol leh petrol chawhpawlh a ni a, tuna Wagon R-a kan hmuh tur hi E20 atanga E80 inkar a ni a. E20 awmzia chu ethanol zaa 20 leh petrol zaa 80 chawhpawlh tihna a ni a. He Maruti Suzuki hmalakna hi India ram chhunga neih niin Suzuki Motor Corporation, Japan in an pui bawk a ni. Wagon R-ah chauh lo pawh hian lirthei hrang hrangah kan la hmu chho dawn a, lirthei khu avanga boruak a chhiat zel avangin sorkar chuan khuahkhirhna a siam khirh telh telh a, flex fuel technology pawh hi la hman zel tur zinga mi a ni dawn a ni.
Flex fuel hmang tur hian CNG te anga petrol khawl pangngaia hman dawnin tihtur a tam lehzual niin a lang a. Petrol khawl pangngai tuna chhuak mekah hian flex fuel hi petrol aiah a hman thut theih dawn lo a, a khawl khawih danglam a ngai dawn a ni. Hei vang hian tuna an phochhuah Wagon R-ah pawh hian a fuel system technology chu a thar hman tir a ni a. Khawvawta tihnun awlsamna tur heated fuel rail bakah ethanol sensor te dah a ni a. A engine management system lamah pawh fuel pump, fuel injector leh thil hrang hrang chu a chi thar a hmang vek bawk a ni.
Tichuan he khawl hi tuna BS6 ai pawha thianghlim lehzual, BS6 Phase-II emission norms mil a ni dawn a. He prototype lirthei hian 1.2L naturally aspirated petrol khawl ang tho kha a hmang a, 5-speed manual gearbox a nei a, power lamah chuan 88.5bhp chu 6,000rpm-ah a pechhuak thei a, torque pawh 113Nm chu 4,400rpm-ah a pechhuak thei bawk a ni.
Hisashi Takeuchi, managing director & CEO, Maruti Suzuki India Limited chuan he ethanol fuel nghahchhana duan Wagon R Flex Fuel prototype, E85 fuel hmang hian a khu bawlhhlawh tuna petrol pangngaiin an pekchhuah aiin zaa 79 in a tlem zawk dawn tih a sawi a, hei hian a lirthei khawl chak zawngah nghawng a nei dawn chuang lo a, a power pekchhuah danglam lo thei turin an duang tih a sawi bawk a ni.
Maruti Suzuki chuan an lirthei te lamah fuel flex hmang lirthei hi kum 2025 atangin an hralhchhuah an beisei thu an sawi a. A hniam deuh e20 erawh hi chu nakum chhoah kan hmuh hmel thung a ni.
Maruti hmalakna dang
Flex fuel mai bakah hian Maruti Suzuki chuan CNG leh bio-CNG lamah pawh tan an la mek a. Tunah hian strong hybrid lirthei tam zawk tichhuak turin hma an la chho mek bawk a. Full electric car pawh kum 2025 chhoah an tihchhuah theih an beisei bawk a ni.
Toyota pawhin flex fuel technology lamah hma la
Maruti Suzuki hi flex fuel lamah hmahruaitu ber an ni lem lo a. Kumin October-ah khan Toyota pawhin ethanol blended fuel hmang Corolla Hybrid thar an lo phochhuak daih tawh a. Hei hi a enchhinna tho niin he khawl hian 2.0 litre petrol khawl a hmang a, E85 ethanol a hmang dawn a, strong hybrid technology a hmang bawk a ni.
Khawvel a changkang chho zel a. Lirthei pawh boruak bawlhhlawh pechhuak lo thei ang berin duan chhoh mek a ni a, company hrang hrangte pawhin zirbingna hrang hrang an kalpui mup mup reng a ni a. He khawvel, boruak chhiain nasa taka a tihbuai mek tawh hi a tichhe belh lo zawngin nasa takin automotive industry lamah pawh hma lak mek a ni a tih theih awm e.