Rural Development Department Minister Lalruatkima chuan tuna Kawnpuiin a paltlang kawngpui enkawl hna tha zawk leh chak zawka kalpui a nih theih nan NHIDCL hotute a hriattir tih a sawi.
Thawhlehni zan khan Lalruatkima hian khuallian niin YMA Hall, Hmarveng, Kawnpui a hawng a. Hmasawnna kawnga thil tul tak chu inkalpawhna tha neih a nih thu sawiin, “Hun reilo te-ah Kawnpui chu 4 lane-in a paltlang thuai dawn a. Tuna kawng kan neih sa enkawl hna pawh tha zawk leh chak zawka kalpui a nih theih nan a enkawltu, NHIDCL hotute chu hriattir an ni,” a ti.
Lalruatkima hian khawtlang tihhmasawn nana ruahmanna ruhrel chu tihpuitlin harsa khawpa hmachhawp insiam a pawi thu sawiin, mahni mamawh tawk leh tangkaipui dan tur anga hmathlir neih thiam a pawimawh thu a sawi.
Khawvel changkannain a ken tel thil hrang hrang awmte chu hman tangkai thiam a pawimawh thu sawiin, hmasawnna kawng zawh tura pawimawh hmasa chu hriselna a nih thu a sawi bawk.
Minister hian YMA chu thlei bik nei lo, mi zawng zawng lenna pawl a nih angin YMA Hall thar chu khawtlang tana hmun tangkai tak ni turin duhsakna a hlan a. Hnam hmangaihna rilru tihpun nan te, tlawmngaihna leh zo nun ze mawi hrang hrang chawinunna hmun a hmang turin kalkhawmte chahin, hnam hla leh ziarang inzirtirna kawnga hmanraw tangkaia hmang turin a chah bawk.
Kawnpui Hmar veng Branch YMA President H. Lalmuanpuia kaihhruai inkhawmah hian khual zahawm, K.Laldawngliana, MLA, Tuirial Assembly Constituency pawhin thu a sawi.
Report-a tar lan danin, Hmarveng YMA Hall sak bultanna hi NEDP sum Rs. nuai 5 hmangin kum 2018 khan kalpui a ni a. Kum 2020 khan rural development department kaltlanga Rs. nuai 8 hmanga sak chhunzawm niin, DRDA office kaltlanga kum 2021-a Rs. nuai 2 leh kum 2022-a Rs. nuai 5 hmangtein sak zawh a ni a. Hnatlang kaltlangin tha 311 seng anga chhinchhiah a ni bawk.