Manchester United chuan January thlaah striker thar lakluh an duh a, Benfica striker Goncalo Ramos chu an ngaihven tan.
United hian Cristiano Ronaldo contract an tihtawp hnuah forward neih belh an duh a, manager Erik ten Hag pawhin striker neih belh chu an duh tih a lo sawi tawh. Nimahsela an mi duh ang tak lakluh theihna remchang a awm loh chuan chet an tum kher lo niin an sawi tel.
United in player an enthlak zingah hian Cody Gakpo, Rafael Leao leh Joao Felix te pawh an tel a, nimahsela Old Trafford-ah hian January a player lakluh chu thil danglam tak an inherchhuak a nih loh chuan an thil kalpui duhdan tak a ni lo niin an sawi bawk a. Tun nipuiah an beisei aia sum an hman hnem tawh avangin January-ah sum tam tham tak thehchhuah an harsat dawn niin chanchinbu thenkhatin an sawi.
Ten Hag hian tlarhma a khel tur duhthlan tur neih belh a duh a, tun season-ah inelna khelh tur an la ngah avangin Ronaldo hmunruak luah tur neih a duh.
Player dang sawilante aiin Ramos hi striker pangngai a chhawr theih a nih avangin an duh ber niin an sawi a. Tun nipui a Euro maktaduai 20 vel man tur nia ngaih kha tun World Cup-ah a chetthat avangin a man hi a let thum vela tam a ni tawh tura ngaih a ni.
Kum 21 mi hi season hmasa khan Darwin Nunez a awm avangin attacking midfield a khelh tir a ni fova. Tun season-ah striker rinrawl a neih niin game 21 atangin goal 14 a khung tawh a, midang khung tur vawi 6 a siamsak tawh bawk.