Meghalaya Chief Minister Conrad Sangma chuan an state-a Inner Line Permit (ILP) system hman an duh, rei tak tihkhawtlai tawh chungchang chu Inrinnia Union Home Minister Amit Shah-an a tlawh hunah a lo sawipui dawn thu a sawi.
Shah hian Inrinni lo awm leh turah hian Meghalaya hi a tlawh hmel a, Shillong-a North Eastern Council (NEC) plenary meeting chu a kaihruai dawn.
Rorel lai, Meghalaya Democratic Alliance (MDA) sorkar chuan Shah hi lo kawma an state-a ILP hman ve ngei a nih theih nan sawipui an duh a. Meghalaya Assembly-ah pawh ILP system hman ve hi an lo titlu tawh a, sorkar laipui pawmpuina an nghah chungchang lo thlen an tum a ni.
“Home Minister Amit Shah hian Meghalaya a lo tlawh a nih chuan Shillong-ah kan lo kawm ang,” tiin Chief Minister Sangma hian a sawi.
Chief minister hian home minister-in an state a tlawh tur hi eng emaw rokhawlhna avanga thulh thut a nih pawhin, amah chu New Delhi-ah zinin an state-in a mamawh chu thlen tura a kal ngei dawn thu a sawi bawk.
Kum khat chuang liam tawhah khan Meghalaya Assembly chuan an state-a ILP hman ve tur hian thutlukna an lo siam tawh.
ILP system hmang tur hian sorkar laipuiin a pawmpui a ngai a, an nawr reng a. Sorkarin a pawmpui mai loh avang hian state chhungah chuan pawl hrang hrangin an theih ang angin hmang thuai tura nawrna an kalpui tawh thin.
An state-a a rang thei ang bera ILP system hman a nih theih nana nawrtu pawl lian leh a hmahruaitu ber, Confederation of Meghalaya Social Organisations (CoMSO) chuan Ningani lo awm turah hian state pumah nawrna huaihawt leh an tum a. ILP system hman thuai bakah thil dang danga harsatna awmte laka lungawi lohna an lantir ang.