Court of Special Judge (Prevention of Corruption Act)-in Serkhan – Bagha Road kawng siamnaa sum tam tham tak tihchingpen thubuaiah PWD Engineer-in-Chief hlui pahnih, Liansanga leh Lianchungnunga te thiam loh a chantir.
Special Judge (PC Act) Dr HTC Lalrinchhana’n eiruk thubuaia thiam loh a chantir takte hi jail-ah dah luh nghal an ni a, vawiinah hrem an nih dan tur puan a ni dawn.
Court judgement & order atanga a lan danin Hmarphei Zirlai Pawlin November 3, 2009 khan Serkhan – Bagha road kawng siam chungchangah eirukna awm ngeia an hriat avangin Anti Corruption Bureau (ACB)-ah complaint an thehlut a, ACB chuan hei hi chhui chiangin, thubuai siam a ni.
Khatihlaia PWD Engineer-in-Chief, Secretary Liansanga chu Rs nuai 107.25 eiruk thubuaiah leh thuneihna hman sualah te leh Serkhan – Bagha road resurfacing-na tur atana sum dil chhuah, a nihna anga hman si loh chungchangah thubuai siamsak a ni a. Khatihlaia Chief Engineer (Highway) Lianchungnunga chu Rs. 42,147 eiruk thu-ah leh Rs nuai 20 surrender loh vanga lapse chungchanga information dik lo ACB hnena a pea puhna thubuai siamsak a ni a, PWD-a Assistant/Accountant B Lalthanpuia chu Rs. nuai 182.55 hman ralna document lem a siam chawp avang leh mi signature a siamchawp nia ngaih a nih avangte-in thubuai siamsak a ni bawk.
Serkhan – Bagha road kawng siamnaa sum eiruk thubuai hi ACB-in an chhui chiannaa an thil hmuhte chu court-ah an thehlut a, hun eng emaw chen ngaihtuah a nih hnuah vawiin khan thuremna a puang ta a, Er Liansanga leh Er. Lianchungnunga te chu Section 120B/420 IPC r/w Section 13(1)(c)(d) Prevention of Corruption Act,1988-ah te thiam loh chantir an ni a. B Lalthanpuia erawh finfiah tha tawk loh avangin chhuah zalen a ni thung.