Aizawl : Shyama Prasad Mukherji Rurban Mission (SPRM) leh MGNREGS convergence atanga Rs. nuai 36 senga sak Sesawng VC-III Community Hall chu nimin khan Assembly Speaker Lalrinliana Sailo-in a hawng a. Hawnna inkhawmah Rural Development Minister Lalruatkima pawh a tel.
Lalrinliana Sailo chuan hall tha tak sak nana hmalakpuitu Rural Development Minister Lalruatkima lawmthu hrilhin, khawtlang mipuite duhna leh mamawhna hre chunga hmasawnna kawng zawh zel a nih tur thu a sawi.
Hmasawnna karah thil tha lovin a nuai thin thu Assembly Speaker chuan sawiin, aia upa zahna, kohhran zahawmna leh hlutnate bakah tlawmngai pawlte thahnemngaihna leh inpumkhatna atana hmalaknate tithuanawp zawnga chetna laka inthiarfihlim turin kalkhawmte chu a chah a. Harsatna hrang hrang ten sorkar tibuai mahse, mipuite khaichhuahna atan SEDP pawh changtlung zawka kalpui zel a nih tur thu sawiin, Daido atanga Mizoram leh Manipur inrinna thlenga inkalpawhna kawngpui tha zawk siam nan Rs. vaibelchhe 33 pawm a nih thu a sawi bawk.
Rural Development Minister Lalruatkima pawhin khawvel hmasawnnain rualawhna tha a hringchhuak tih sawiin, mahni hlawkna chauh um lova tha leh tlo zawka hnathawh kawnga inelna thianghlim a awm mek nia sawiin, lawmawm a tih thu a sawi.
Khawpuia hmasawnna ruhrel awm ang thingtlang mi ten an neih ve theihna turin ‘Shyama Prasad Mukherji Rurban Mission’ chu Mizorama RD block pahnih – Aibawk leh Thingsulthliahah te kalpui a nih thu RD Minister chuan a sawi a. India rama he mission kalpuina cluster-300 zingah Mizoram chu thawk tha ber dawttu an nih thu leh hemi lawmmanah hian SPRM chu Khawzawl leh East Lungdar RD block-ah te kalpui tura central sorkarin a pek thu a sawi bawk.
Sorkar thuchhuahin a tarlan danin Sesawng VC -III Community hall hi Shyama Prasad Mukherji Rurban Mission leh MGNREGS convergence atanga pawisa hmuh hmangin Rs. nuai 36 senga sak a ni a. A dung feet 60, a vang feet 30 a zau a ni a, a san zawng feet 22 a ni.