Aizawl: BJP Mizoram President Vanlalhmuaka chuan state leh Chakma Autonomous District Council (CADC)-a sorkar mek, MNF-in sorkarna an siam chhungin hmasawnna lamah hnathawh engmah an nei lo tih a sawi.
Nimin khan BJP Mizoram Statement Executive meeting chu Kamalanagar II (Chawngte)-ah neih a ni a. Meeting neihna tur hmuna mual inkhawm buatsaihah thu sawiin Vanlalhmuaka hian, “CADC leh state-a sorkar mek MNF party hian kum nga chhunga Chief Minister Pu Zoramthanga hoa CADC tan an tih langsar ber chu Chief Executive Member (CEM) paruk paruk pek a ni,” a ti.
Vanlalhmuaka hian state leh CADC-a MNF-in sorkarna an siam chung hian hmasawnna lamah erawh hna thawh engmah a nei lo tih sawiin, “Hei hian MNF kaihhruai sorkarna reng rengah chuan development ngaihthah niin, mahni inhaivur hi an thupui a ni a, mipui kan harsain, kan rethei tawlh tawlh a, ram rawngbawl tura kan thlante erawh chu an lian tual tual mai a ni,” a ti a. Mipui retheihna hmu thei viau sorkar hi nakkum MLA inthlanpui leh CADC inthlanah paih thlak an ni ngei tawh dawn tih a sawi.
Prime Minister Modi hnathawh ropui tak, state-ah leh district council area-a a taka development a thlenna tur leh hmasawnna tak tak neih a nih theih nan central double engine dik tak, BJP thlan tlin a ngaih avangin MNF emaw, party dang emaw thlan tlin a nih chuan eirukna an thlang tihna a nih thu a sawi a. “BJP in vote chuan Pu Modi-a in vote tihna a ni a, development atan vote inpe a, development pawh a rawn thleng dawn tihna a ni,” a ti bawk.
State Executive Meeting hi Dr BD Chakma, MLA, CADC District President ni bawkin kaihhruaiin National Council Member Nirupam Chakma chuan Political & Economic Resolution a pharh chu pass a ni.