- LH Hauheng, Nghilhloh Run
Thu Kamkeuna:
Zing kar boruak a vawt vin hle mai a, kan in kawtah dai a tla zeuh zeuh va, khawchhak lam atangin pitte leh lailen ten tho tawh ru ti ni awm fahranin an chiap nak nak hlawm a. Zing ni chhuak a lo tlangsang a, dawl hnah chunga daifim tling piau mai te chu a chhun tle ser ser a, hmuh an va nuam em. Aw! lei nun hi an va timawi em…
MI TIN TANA HLIMNA:
“Enteh a lo herchhuak dawn ta,
Mi tin tana hlimna tur chu;
Fam ngai khawhar mangangte Lalpa,
Min hnemin min awmpui ang che.”
Ni chhuak a lo tlang sang a, ni lum aiin kan inhan sangmar vel a, aw, hetiang hun hi mi sangtam hmuh chak, an hmuh hleitheihloh avanga an rumna thlaler ram hi mit pahniha han hmuh hian hah a dam bik thin. Mi nung damlai nih hi a va nuam em! Chungte chu nuam tiin hre engang mah ilangin, kan nu leh pa, unau leh thiantha te meuh tel ve tawh lohna hmuna he khawvela masi hlim taka hman han harsatziate hi aw; mi lungngaite hnemtu Lalpa hnen thlen hlan mawlh te hi nia nghahhlelh awm ni.
HUN LEH NI TE:
“Hun leh ni te an herliam zel a,
Sikni eng mawi a lo lang leh ta;
Pârmawi tin an vul sirva lungrual nen,
Lalpian hmuahzai an rel em ni.”
Pangtina neih lem loh chuan, rin aiin hun hi a kal chak a, vawiin hi hmanlai an chang zo zel emaw a lo ni a. Pawltlâk thla a lo inherchhuah hian chuan, mathei lovin lung a leng a, kawngkamah japanhlo pâr, pholeng pâr leh kawihthuang pâr ten hunpui masi an an urlawk bik emaw ni, tih mai turin vullai pâr an chhuaha an mawi teh a sin.
He hunpuiah meuh hian zawng, Pangpâr chitin rengin vullai pâr chhuahin leh chung leng sava hram thiam mawitinte nen Lalpianni champha hmuakin an hlimin an mawi a sin. Aw! thlir nin an har ka ti thin.
REI LO TE-AH A RAL LEH DAWN:
“Mahse rei lo te an i ral leh dawn,
Hringnun khua a har leh ngei dawn;
Nunhlui kumhlui chang leh mai tur,
Engtikah tawng leh che i maw.”
Hunpui a lo thlen tawh a, mi lungleng mi nih theih te hi a hlu a, a ropui ngawt hian ka hre thin. He leilungah hian tuktin pâr pawh tluk phalo turin kan piang chhuak a, a changin mawina leh duhawm bikna riau te chu nei ve thin mah ilangin, kan mawina leh duhawmnate chu thihnain vawi leh khatah min nuaibo sak leh a, aw, hengte hi nia masi a chhungtinte kan tahna titamtu lehzel chu lo ni.
Hringnuna kan khawhar leh na tur thilte hian min rawn deng dawt a, chu chu kan man pha thiam hek lo. Mahse, kan nunhlui kumhlui chang leh mai tur te hi uibeh leh salbeh theih a ni ngai lo va. Ral leh tur nunhlui kan neihte hian he hringnun hi a va tihlu bik em tih chang hi ka ngah mai. Chu chu mitin ina kan hlimpui thin a lo ni fo zawk a. Chu chu zirthiam a ngai a ni.
HMANAH CHUAN:
“Hmanah chuan lenrual lungduhte nen,
Fakhla saa tlaikhua varin;
Hlimni ui tur ui em emin,
Lal lo piang hlimten kan lawm.”
Ni e. Hmanah chuan hlimten kan thian tha, unau, chhung leh khatte nen Lalpian hun lawmin hlimten zankhua thakin fakhla sain hlimzai kan vawr thin a. Ui tak chunga ral phal mai lovin kan chelh a, kan vuan a, kan thlah phal tawh ngai lo thin kha a ni a. Mahse, rei lo te-a liam leh mai turin Remna nausen lo piang, hlimten kan lawm a, mittui luang ngiai ngiai chungin fakhla kan han sa a, mah se, rei lo te atan lek a lo ni.
Lei hringfate nun chhung hian, natna, tahna, beidawnnate hian min run a, min tham a, kan hmachhawn a lo ngai a. Kan hlimna leh lawmnate hi khapkhat chen lek lek a nih chan lah hi a va tam narawh em! He hunpuiah meuh hian zawng fam ngai lusun khawharte tan hian inhnem hnan tur hi avang a ni, Pathian lam en loh phei chuan a va ipik chiang em—khawvel hi.
Kei chu he hla hmang hian u-ama fak leh ila, a den denin min deng mai se, kan tah a, kan mittui far te hian, tangkaina nei map dawn lo mah suh se la, kan mittui tlakna phena kan tahnate tal hian kan thinlungah Lal thar a piantir tlat hi ka ring fan e. Heng Roliana Ralte hla siam hmang hian; A lo herchhuak leh dawn ta.
Hun leh ni te an herliam zel a,
Sikni eng mawi a lo lang leh ta;
Pârmawi tin an vul sirva lungrual nen,
Lalpian hmuahzai an rel em ni.
Enteh a lo herchhuak dawn ta,
Mitin tana hlimna tur chu;
Fam ngai khawhar mangante Lalpa,
Min hnemin min awmpui ang che.
Hmanah chuan lenrual lungduhte nen,
Fakhla saa tlaikhua varin;
Hlimni ui tur ui em emin,
Lal lo piang hlimten kan lawm.
Theih chang se chhungkim lungduhte nen,
Lal pian cham lawm ka nuam e;
Suihlung ruala tlai khua varin,
Thinlai ruk lawm a kim ngei ang.
Mahse rei lo tena i ral leh dawn,
Hringnun khua a har leh ngei dawn;
Nunhlui kumhlui chang leh mai tur,
Engtikah tawng leh che i maw?