Aizawl : Lunglei West bialtu MLA, Minister ni bawk C. Lalrinsanga hovin nimin khan Lunglei district huamchhunga ATL road thawmthat mek leh Lunglei khawpui chhung kawng siam mek dinhmun leh hmalak tulna te sawiho a ni.
C. Lalrinsanga chuan Lunglei district chhung inkalphawna kawng siamthat hna kal mek chu sorkarin a ngaihpawimawh thu sawiin, PWD changtu Chief Minister Zoramthanga hova hmalak zel dan tur kawngah ruahmanna an siam mek thu a sawi a. Kawng siam piahlamah Lunglei khawpui chhungah tui chhe paihna tha zawk an neih theih nan UD&PA department kaltlanga hmalak theih dan tur pawh ngaihtuah mek a nih thu a sawi.
PWD hotute leh contractor te chu working season hmang tangkaia chak taka hnathawk tura chahin, C Lalrinsanga chuan harsatna an neih te a hnena thlen thuai thin turin a chah a. Lunglei khawpui chhung kawng resurfacing hna thawk mektu EL&TY Enterprise ten chu takin an thawk nia sawiin, lawmawm a tih thu a sawi.
Lunglei HPC Vice Chairman Lawmawma Tochhawng pawhin Aizawl – Thenzawl – Lunglei (ATL) World Bank kawng 100Km-160Km (Kanghmun – Lunglei) leh Lunglei khawpui chhung kawng thawm that hna kal mek piah- lamah Pialthleng kawng leh Khawiva kawng te pawh special assistance to states for capital investment (SASCI) kaltlanga siamthat theih dan tur ngaihven mek a nih thu a sawi bawk.
PWD Lunglei Road Division EE Er Pazawna’n Lunglei district-a kawng siam mek chungchang sawiin, Aizawl-Thenzawl-Lunglei (ATL) World Bank kawng 100Km – 160Km (Kanghmun – Lunglei) kawng siam hna thawktu Bhavya Construction-te Defect liability period hi 31.3.2023 thleng a nih thu leh repair ngai te an thawh that loh avangin PWD hotute, Lunglei DC, YMA te nen pawh vawi engemawzat meeting leh inspection neih a nih thu a sawi a. Repair hna an thawh that loh avangin departmental a hnathawh tak a nih thu leh Bhavya Construction-te Security deposit Rs vaibelchhe 1.93 leh performance security Rs. nuai 74.69 chu hman chhoh mek a nih thu a sawi bawk a ni.