Aizawl: Labour, Employment, Skill Development & Entrepreneurship Department (LESDE)-in hmeichhia, rualbanlo leh zirlai mahni thiam thil hmanga eizawnna kalpui mekte chawikan nana a buatsaih, Christmas Fair chu nimin atang khan Aijal Club Park-ah tan a ni.
Christmas Fair hawnna inkhawm hi LESDE Director Angela Zothanpuii’n a kaihruai a, khuallian leh fair hawngtu, Vanrammawii chuan mahni intodelha hmasawnna kawng hawi turin thiam thil neih a pawimawh thu a sawi.
Sorkar hna leh company-a hnaahte thawh vek theih a nih dawn loh avangin mahni kut kawia sumdawnna chu a la pawimawh tulh tulh dawn tiin, a thalaipuite chu hausakna chu an kutah a awm tih hria a, sum hai chhuahpui theih thiam thil neih kawnga tan la turin a fuih.
He hunah hian LESDE Secretary Lalramsanga Sailo leh LESDE Jt. Director T Thangropianga pawhin thu an sawi a ni.
Christmas Fair-ah hian hmeichhia, rualbanlo leh zirlaiten anmahni kutkawih hmanga thil an siam chhuah chi hrang hrang stall 43-ah phochhuah a ni.
December 15 leh ni 16 zing dar 10:30 atanga zan dar 8:00 thleng mipui en an duhzawng lei theih turin hawn a ni a, ei leh in lam leh naupang intihhlimna tur hrang hrang chhawpchhuah a ni bawk.