Indonesia thliarkar, Sulawesi chu lirnghing a sawi a, thil tam tak a tihchhiat zingah damdawi in pawh a tel a, mi 30 vel thiin chhanchhuah hna thawktuten in chim leh chhe karah chhanchhuah hna an thawh mek.
Magnitude 6.2-a na lirnghing hi nimin zing khawvar hmaa thleng a ni a, a hmaa na vak lova a nghin hnuah na zawkin a thawk leh a ni.
Mi za tel inhliam an awm a, mi sang telin chenna tur an neih loh phah bawk.
Tual chhung chanchinbu chuan Mamuju khuaa Mitra Manakarra hospital chimah damlo paruk leh an chhungte eng emaw zat a chim karah an tang niin an sawi.
Mamuju khuaa rescue agency-a mi, Arianto chuan tangte chhanchhuak tur hian an beih mek thu news agency AFP hnenah a sawi a, an zat chiah an la hre thei lo tih a sawi bawk.
He khuaah hian thi 26 vel an chian tawh thu thuneitute chuan an sawi a, in chim karah hian mi dang pawh an la awm an ring a, an pun ngei an ring.
Lirnghing hi Majene khawpui hmarchhak lam km ruk vela hla, lei hnuai km 10-a atanga intan a ni.
Majene-ah hian mi pali an thi tih a ni a, za tel inhliam an awm bawk.
Lirnghing hi an ram sanaa zing dar 1:00 (India-a Ningani zan dar 10:30) vel niin second sarih vel a nghing.
Tsunami thleng palh thei laka inralrinna khawn a ni lo va; mahse, mi tam tak chuan hmun him lam panin an chenna in an chhuahsan phah.
Tual chhung mite chuan in chhe nasa zingah hian hotel pahnih, governor pisa leh bazarpui pawh a tel niin an sawi.
Thuneitute chuan lirnghing na zawk (aftershock) a thleng leh thei niin an sawi a, hei hian tsunami pawh a thlen thei nia sawiin inring turin mite an hriattir.