Congress President Lalsawta chuan Mizoramin diknaa rorel tur sorkar a mamawh tih nimina chanchinbumite a kawmnaah a sawi.
Lalsawta chuan Congress Bhavan-a President Room-ah press conference a nei a, ram tana pawimawh ber chu sorkar tha, danin ro a relna a nih thu sawiin, hetihlai hian tuna Mizoram dinhmunah erawh mipuiin sorkar ring zo lovin anmahni kutah ram rorelna an kengkawh tan ta emaw tih theih hial a nih thu a sawi.
Mizoram chu sorkar nei lo ang hialin a awm ta tih sawiin, “Diknaa rorel tur sorkar kan mamawh,” tiin a sawi a, “Mizoramin ram leilung a nei tha a, mipuiten sorkar thu an zawm tha bawk nen, sorkar tha chu nei ila state dangte awh tham kan ni ngei ang,” a ti bawk.
Congress president chuan sorkarin sum a enkawl chungchang sawi bawkin, “Leiba a pungin ram rohlu kan siam theihna tur tam takah central sorkara ministry leh department tam takte hna thawhna tura State Matching Share (SMS) pawh kan pe hlei thei lo va, sum enkawl kawngah hian sorkar hi a hlawhchham niin ka hria,” a ti.
Inthlannaa sum seng tlem tura politician-te leh ram mipuite a ngen thu sawi bawkin, “Inthlan kaihhnawiha sum leh therhlo laka kan fihlim theih chuan kan ram chhiat zelna tur kan dang let dawn,” a ti a, hei hi Election Commision of India (EIC) leh Mizoram People’s Forum (MPF) duh dan pawh a nih thu a sawi.
Sum hmanga inlei tlingten sorkar atangin a rulhna tur an zawn a ngai leh thin tih sawiin, chutiangah chuan sorkar tha siam a har thu Lalsawta chuan a sawi bawk a ni.