Zirna bul tan tha leh tur hian engtia hmalak nge tha ang a, zirna uar tur hian engtinnge kan inzirtir tan ang tih hi ngaihtuah tham tak a ni. Sorkar school a lun lo telh telh a, private school ten result tha tak tak an nei fo reng bawk. HSLC result a chhuak a, top-10 a lang zingah sorkar school an awm lo ta fo mai.
Zirtirna inang reng, sorkar school-a thawkte phei chu paltlang ngai zawng zawng paltlang a, zirtirtu hnaa lut leh thawk an ni chungin an zirlaiteah chutiang hmuh tur a awm lo leh tlat mai thinte hi ngaihtuah a ngai e.
Kumin atan HSLC result a chhuak chiaha School Education minister chuan tun tum HSLC result chhuaka pass awm lohna sorkar sikul leh RMSA school te chu sorkarin a chhante zawtin leh eng harsatna nge an tawh tihte sawifiah tura ‘show cause notice’ pek an nih tur thu a sawi a. Heng sikulte harsat tawhte ching fela siam that ngaite siam tha turin sorkarin hma a lak tur thu a sawi bawk.
Minister thusawi hi a lawmawm a, zirlaite pass tir miah lo school te phei chu na zawka nawr leh a tul anga hmalak nat zui pawh a ngai viauin a rinawm. Heti hne hne hi chuan sorkar in quality education an sawi fo hi kan hnaih mai dawn lo. Kan hlat telh telh zawk dawn.
Na zawkin sorkar hian hma la se la, private school te zirtirna bik hi a danglam chuang lo tih hrechungin an hnuaia zirtirtu hna thawktute chungah hian pressure na zawk hi pe fo in, enzui reng bawk teh se.