World Cup semi-final an vawikhat khelhnaah Morocco in theihtawp an chhuah a. An khingpuite chu a tawp thleng hahdam tir bik lo mahse team pahnihte an inthlau a, 2-0 in France in hnehna changin Argentina nen final an khel ang.
Nilaini zan semi-final inkhelah Morocco hi tlawm zawk tura mi zawng zawng rin an ni a. Player te enin an inthlau a, ram chanchin chhui let pawn football inelna sangah an hnuhma a inthlau.
Al Bayt Stadium-ah erawh tun tournament a ropui taka che Morocco an beidawng duh miah lova, an defender pawimawh Nayef Aguerd a inhliam hnuah pawh an talbuai tha duh chiam lo.
France tan an inkhel hmasa bera a u inhliam avanga rinrawl ni ta Theo Hernandez-a’n minute nga na lekah goal a khung nghal a. A tir atangin an dinhmun a tha.
Morocco in taihmakna leh huaisenna an lantir a. Nimahsela France erawh an thiam a, goal hmaah huntha an neihin an hlauhawm a, ball an chanin tihsual an nei duh lo. Minute 79-naah substitute Randal Kolo Muani chuan an hnehna tichiang turin goal a khung belh.
France hian Pathianni zanah Lusail Iconic Stadium-ah Argentina hmaah an lallukhum humhim an tum dawn.
Champion lai nge nge
France in kum 60 hnua World Cup trophy humhim thei hmasa ber nih an hnaih a, final lut turin talbuai loh bak an ammawh lo.
Brazil in kum 1958 leh 1962 a an humhim hnuah an trophy chawi nawn leh turin huntha an nei dawn.
Morocco tantute thawm a ring a, France lamin ball an chan apiangin nasa takin thawm an nei thin. France inkhel in nidang a pha lova, amaherawhchu hnehna chang turin ropui taka khelh kher an mamawh lo.
Tlarhnungah an talbuai lova, a bikin Liverpool defender Ibrahima Konate a kheltha hle. A hnung lam a ngheh laiin a hmalamin an tih tur ang tha takin an ti thei. Goal tha vawi hnih an khung a, tun World Cup a champion tura rin pahnihte final-ah an intum dawn.
Dayot Upamecano aia khel Konate chu a fitness in duhthu a sam lo niin inkhel hma in sawi awm mahse engmah tihsual a nei lova, Pathianni zana final khel turin a buk a ti rit hle.
Morocco player-te huaisenna avangin Didier Deschamps te an hahdam thei miah lova, Atlas Lions vanneih zan nise goal khat tal khung thei an ni.
Africa chhuanvawr
Africa khawmualpui atanga World Cup semi-final khel thei hmasa ber an ni a. Morocco dai chin a ropui.
Hei chauh hi a ni lova, semi-final an luhna kawnga an team paltlangte thlirin engti kawng mahin sawi nep theih an ni lo. |an rualna an chakpui a, an rilru len leh huaisenna avangin tawh an khirh thin. Position pawimawha an star player-ten an kova mawhphurhna tla an hlen chhuak tha bawk.
Tun tournament-ah inhliamin an squad a ti buai thin a, France lakah pawh Aguerd bakah inhliam chunga khel Romain Saiss a khel zo thei lo.
Jawad El Yamiq hmangin an si phurh an sut teuh a. Tling zo lo mahse an thlen chin a ropui.
Morocco coach Walid Regragui chuan, “Kan theihtawp kan chhuah a, hei hi a pawimawh ber. Warm up laiin Aguerd, Saiss leh Mazraoui ten neuh neuh an nei vek a, mahse hei hi chhuanlam a tling lo.” tiin inkhel a thlirlet.
France manager Didier Deschamps chuan, “Rilruah thil a awm hnem a, mahse pen hnuhnung ber a la awm. A awlsam lova, mahse kan thlen chinah lawmna tur hlir a la ni.” a ti ve bawk.