India-a Bihar-ah zu chhe in vangin mi 31 vel an thi a, eng emaw zat damdawi inah an la awm bawk tih thuneitute leh tual chhung chanchinbuten an sawi.
Thihna thlen tamna hi khaw pahnih, la thingtlang tak hmunah a ni a. He state-ah hian hmeichhe pawl hrang hrangin kut hnathawk rethei tak takten an sum thawh chhuah zu mana an hmang nasa lutuk tihziaawm a nih theih nana an nawr avangin kum 2016 atang khan zu zawrh leh in khap a ni.
Zu khapna hi India state dangte pawhin an kalpui nual a, khapna hmunah hian a ruka zu sa leh siam an awm phah a. A thlawr leh sak dan him lo tak a nih thin avangin kum tin mi tam takin an thihpui thin.
Tun tuma thil thleng hi state khawpui, Patna atanga hmar lam km 60 vela hla, Saran district chhungah a ni a. Thawhlehni atang khan zu chhe inte hi an luak tan a, an dinhmun a hniam zui nghal ta zel a ni.
Mi eng emaw zat damdawi in panpui an nih laiin an thi a, Nilaini leh Ningani khan damdawi inah an thi leh hlawm bawk a; tual chhung chanchinbute chuan mi 31 thi an awm tawh tih an tar lang a. Thuneitute pawhin an pun ngei a rinawm tih an sawi bawk.
Police hotu lian, Santosh Kumar chuan damdawi ina la enkawl mekte zingah hian khaw hmu thei lo an awm nual tih a sawi.
Chhiatna thlenna chhehvelah hian dan lova zu zawrhna hmunte an vai nghal tih Kumar chuan AFP news agency hnenah a sawi a. “Zua sumdawng eng emaw zat kan man a, mi dang pawh kan man nual,” a ti.
India-ah hian kum tin zu litre vaibelchhe nga vel in ral ziah anga chhut a ni a, heng zinga 40% vel hi a ruka sak leh zawrh a ni tih International Spirits & Wine Association of India chuan a sawi.
A ruka sate hian a thawh ran nan leh ruih awlsam nan methanol an telh tam thin a. A tam lutuk chuan mitdelna, thin chhiahna leh thihna hial a thlen thei.
July thla khan khawthlang lama Gujarat state-ah pawh zu chhe in vangin mi 42 an thi a. He state pawh hi Indian state zinga zu siam, zawrh leh in khapna a ni.
Kum 2020 khan hmar lama Punjab-ah pawh zu chhe in vangin mi 120 chuang an thi.