India chuan tun hnaia Gambia rama naupang thahnem tak thih phahnaa puh, khuh damdawi hnang chi pali chu endiknaah a him tawk vek tih a sawi.
WHO chuan October khan heng damdawi pali, India-a Maiden Pharmaceuticals-in an siamte ei kaihhnawihah naupang 66 vel an thi tih a sawi a ni.
Hetih lai hian India-a damdawi thununtu, drug regulator chuan WHO hian engmah finfiahna tha an nei lo tih a sawi.
India hi Africa khawmualpuia damdawi thawn chhuak tam ber ram a ni.
December 13-a India-a drugs controller general-a hotu, Dr VG Somani-a’n WHO-a regulation & prequalification director, Rogerio Gaspar hnenah lehkha a thawnah a him thu hi tar lan a ni.
India hian October khan WHO-in him tawk lo anga a sawi avangin an chhui tur thu an lo puang tawh a ni.
WHO chuan damdawi pali – Promethazine Oral Solution, Kofexmalin Baby Cough Syrup, Makoff Baby Cough Syrup leh Magrip N Cold Syrup te sample hi laa an endiknaah ‘diethylene glycol leh ethylene glycol tam uchuak tak a tel’ tih an sawi.
Diethylene glycol leh ethylene glycol te hi mihringin a ei/in tam lutuk chuan thihna thlen thei a ni.
Dr Somani-a lehkha thawnah hian sorkar laboratory-a an endiknaah ‘hlauhawm engmah hmuh a ni lo’ tiin tar lan a ni ve thung.
Tun kar tirah khan Union Minister of State for Chemicals & Fertilisers Bhagwanth Khuba pawhin Parliament inkhawmah khuh damdawite hi Regional Drug Testing Laboratory, Chandigarh chuan ‘a him tawk’ tih a hmu chhuak tih a lo sawi ve tawh bawk.
Endikna hmasaa thil hmuhte hi mi thiam rual awmna panel-in an zir chiang zui leh mek a ni.
Dr Somani chuan panel hian WHO hnen atang hian an ‘thil hmuh kimchang’ pe turin an ngen tih a sawi a. ‘A kimchanga hriat chuan thihna thlen chhan pawh a hriat ang’ tiin a ziak a; mahse, tun thlengin an la dawng lo tih a tar lang a. Lehkhaah hian eng committee ber hnen atangin nge an beisei tih tar lan a ni lo thung.
Dr Somani-a pisa chuan BBC hnenah hemi chungchang hi union health ministry-a zawt chiang turin a ti a. BBC hian ministry hi email thawn tawhin WHO pawh sawi duh an neihte a zawt tawh bawk.
Union information & broadcasting ministry-a senior adviser chuan BBC hnenah WHO chu naupangte thih chhan thutlukna siam turin a che rang mah mah tih a sawi.
“India sorkarin a chhui zuina, a endik leh zir chianna atangin WHO hian a thil puh hi a dik tawk lo tih a lang,” tiin Kanchan Gupta chuan a sawi a, WHO chuan ‘a chhan dik tak hre hmasa lovin silai a hmet puak hma lutuk’ tih a sawi bawk.