Tun thla tira Ebola a leng tih an puanna, Democratic Republic of Congo khawchhak lamahah chuan invenna damdawi pek an kalpui tan tih WHO chuan a puang.
DR Congo-ah hian Butembo-ah February 7 khan Ebola kai hmuh chhuah niin mi paliin an kai tawh.
Ebola kai an enkawl hmasak berna medical centre-a thawkte chu pek hmasak an ni tih WHO chuan an sawi.
Hetih lai hian Africa khawmualpui khawthlang lama Guinea-ah chuan Ebola hi a leng tih puan a ni tawh bawk.
DR Congo-ah hian Ebola leng hmasa hi nikum June thla maiah khan a reh tih puan a ni chauh.
August, 2018 atanga leng tanah hian mi 2,287 zet an thi.
Ervebo vaccine an tih, dose 8,000 dah that sa chu tun tuma invenna damdawi peknaah hian hman a ni tih BBC chuan a tar lang.
Ervebo hi Ebola vaccine siam chhuah hmasak ber niin US Food & Drug Administration (FDA)-in December, 2019-a a pawm kha a ni.
Guinea-ah hian Pathianni khan Ebola a leng thar leh tih an puang a, mi pasarih kai awm tawhin pathumin an thihpui.
Chhimchhak lama Nzérékoré khawpui bul lawka Ebola hri kaite hi nurse thi an vui hnu lawkah an khua a tha lo va, an luah a, thi put an nei bawk.
“WHO chuan thil awm dan a ngaihven reng a, invenna siamtute pawh biain mamawh zat chah thlen thuai a nih theih nan hma lak a ni,” tiin Guinea-a WHO palai, Alfred George Ki-Zerbo chuan a sawi niin AFP news agency chuan a tar lang.