Tripura-a rorel lai, BJP-in an thawhpui, Indigenous Peoples Front of Tripura (IPFT)-in Ningania Tripura Tribal Areas Autonomous District Council (TTAADC) huam chhunga darkar 24 awh bandh an huaihawt chuan nunphung a tibuai nasa hle.
TTAADC hi Tripura-a hmun thuma thena hmun hnih zet niin ram leilung fate luah ram a ni a, an state-a mihring cheng hmun thuma thena hmun hnihte niin mi nuai 40 vel an ni.
Bandh hi IPFT chuan an thil phut panga tihhlawhtlin a nih theih nana an huaihawt a ni a, heng zingah hian state hran, ‘Tipraland’ an phut pawh a tel.
Heng bakah hian state hran an ngiat chungchang zir chiangtu high power modality committee-in report an siam hmuh ve te, district council thuneihna tihsan te leh an tawng pakhat, Kokborok chu 8th schedule-a telh te pawh a tel.
Bandh huaihawt chhung hian kawngpuiah lirthei a kal lo va, sorkar pisa leh pawisa khawihna hmun hrang hrangte a inkhar vek.
Dawr leh bazar pawh a inhawng lo.
Northeast Frontier Railway pawhin passenger phur rel an tlantir thin chu an dintir bawk.
Additional Inspector General of Police (Law & Order) Subrata Chakraborty chuan bandh hi a muanawmin buaina chhuak a awm lo niin a sawi.
“IPFT worker leh a thlawptu mi 600 chuang man an ni a, heng mite hian hmun 80 velah punkhawm an huaihawt,” a ti.
IPFT assistant general secretary Mangal Debbarma chuan an party chuan sorkarin an thil phut a tihhlawhtlinsak lo a nih chuan an nawr zel dawn tih a sawi.
Sorkar chuan inthlan hmain thil tam tak a tiam a; mahse, engmah tihhlawhtlinsak a nei lo niin Mangal Debbarma chuan a sawi bawk.