- F. Vanlalrochana
Hmangaihnain khawvel thim a rawn chhun en hun Krismas kan lo thleng leh dawn ta. Heng hunte hi a ropui a sin; hmasang ata kan sualna lo inkhawlkhawmte zawng zawng laka min chhanchhuak turin Hmangaihna Lal fapa chu khawvel thimah a lo kal a. He hun ropuiah hian i tan engnge ka tih ang tih ngaihtuahin ka buai hle a ni.
Ka khawvel ropuina zawng zawng te hi, min hmu vek a; Engmah ka nei lo. I tan krismas thilpek ropui leh langsar tak pek tur che ka nei hauh lo tih chu i hriat kha; nang aia hrechiang an awm hek lo, chu pawh i hria e.
Enteh, thlasik kawl eng leh thangvan boruak thiangte khi! Bethlehem daia an beram te venga an hun hmangtu, Van zaipawlte’n ropui an chhuah khum berampute pawh kha mi lungleng tak an nih ve ngei ka ring thin. Nupuite an nei vein, khami zan khan an nupuite pawh an thlahle ve em emin ka ring a sin.
Judai rama krismas ni eng te chu a mawi bik riau hian ka ring tlat thin. Nitla turin bethlehem dai a han chhun ruih mai turte chu ka hmu chak em em thin. Nang nen han thlir dun ila, “A mawi ti raw” han ti leh ha la, khawvelah a aia hlimawm dang hi ka tawng chuangin ka inring lo a sin.
Khatla kawng chhova i thiannu nen in kaldun ka hmuh atang che khan ka hmangaih tawh che a. Kan han innei a, ka hmangaih zual sauh sauh che a. Neih aiin neih loh ka ngah daih zawk a ni tih i hre reng a; chuti chunga i pasal atana mi thlang hi mak ka ti thin! Ka vanneih zia hi. Pathian hnena lawmthu ka sawi lo thei lo. Hausakna sum leh paite, thil dang zawng zawng aiin hmangaihna hi dah pawimawh a, ngaihhlut daih zawk tur a ni tih khawvel hi i zirtir a, chu chu hmangaihna vanga a fapa tirtu pawh khian a hmu a, kan nupain mal min sawm a nih hi!
Ka tan hian thil i ti nasa em em a. Min hmangaih a ni tih hriat a, ka fate tan nu duhawm tak i ni ringawt mai pawh hi ka tan a ropui tawk a. I chawhmeh siam eitu nih ringawt pawh hi vanneihna a ni a sin.
Chuvang chuan, he’ng hla, Dolly parton-i te leh Kenny Rogers-a ten an sak dun, “Knowing you are in love with me, is the Greatest Gift of all”, tihte hi ka tan chuan hla mawi tawp khawk a ni lo thei lo.
Hetiang khawpa ka tana i hlu chung hian i tan chuan i pasal tlaw tak kha ka ni mai a. He Krismas-ah pawh hian i tan engemaw tal chu tih ve ka duh a, tih theih erawh ka nei tlem khawp mai. I pasal duhtak lak ata hi nangpawhin beisei i nei tlem ngawtin ka ring. I Pasal duhtak ti ngama ka awm hi ka tan chuan thilpek ropui tak a ni sa.
Urlawk zan te hi hawh teh, hlim taka hman dun dan i zawng teh ang, Hlim lo takin kan hmang thin ngai lo na a…Hla mawi tak ngaithlain zan khuain titi mai mai ila, hmana kan hman dun thin dan ang khan; thlasik tlai ni tla tur lunglenthlak zia te sawi dun leh mai mai ila. Arte pawh kang dun ve leh ila- kan nulat tlangval laia kan tih thin dan ang khan. Nun hi a mawl thei ang berin, a thianghlim thei ang berin i hmang dun zel ang hmiang.
Thawmhnaw mawi leh nalh tak tak te lei sak tur chein, ka theilo tih i hria a. Kum tluanin ei tur tuihnai pawh kan ei hlei thei lo a, chuvangin, i tan liau liau eitur tui tak ka han lei dawn em ni?? Kan pahniha kan ei dun dawn loh chuan chung chu i duh dawn hauh lo tih ka hria. Engpawh tih sak dawn che ila, ka chan tur mi zuah i tum ve zel si a. I tana ka tih theih tawkah pawh engemaw tak mi tihlet sak ve zel i tum thin si a.
Engnge ka pek ang che. Engnge i tan ka tih ang? Duhtak, he krismas hi hmangaihnain par a chhuan hun tur niin ka hria a. He hunah hian i tana ka pek theih hlu ber, leilunga thil awm mi dang te ka pek theih zawng zawng aia hlu zawk, ka thinlung leh kaa hmangaihna hi ka pe nawn leh ang che.
Ti khawp hian mi hmangaihin mi duhsak a, ka kawng mi tihen sak thin. Mahse, kei hian kan inneih hnuin, ‘ka hmangaih che’ ka la ti nawn leh miahlo tih ka hrechhuak a. Ka chet danah chuan hre thin mah la, i pasal duhtak tawngkam atanga i la hriat ngailoh a ni tlat mai- KA HMANGAIH CHE.
Hmangaihna vangin van lal fapa kha a in ngaitlawm a, kan tan lei sual thimah a lo vak vai a nih kha. Thawmhnaw mawi te , eitur te, pangpar mawi tak tak te hi a hlu e. Mahsem hengte hi chuan rei an daih lo. An chuai a, an mawih a, an ral mai thin. card mawi leh thu lungkuai tak tak te hi an hlutna kawng zawngah chuan a hlu e, lehkha a ni a, a zawp a, a thler a, a bo thin a ni. Tin, a leina tur pawh ka nei mang lo bawk. Hmangaihna erawh chu chatuan daih a ni.
Ka retheihna zawng zawng min tawm pui a, ka lungngaihnaah min hnem a, ka thlaphannaah min muan a, ka thinur te i aw nem takin min chhem kian sak a, ka damlohvin hmangaih takin mi enkawl thin. Keipawhin he krismas atang hian i tan inpek leh zual ka tum e.
Hei hi ka krismas present, ka pek ve theih che lo ni rawh se- KA HMANGAIHNA CHE hi. Ka nupui duh tak, ka hmangaih che a sin.