Aizawl : Mizoram Science, Technology & Innovation Council (MISTIC) buatsaihin ‘National Mathematics Day 2022’ lawmna hun, Mizoram Rural bank Auditorium, MINECO-ah nimin khan hman a ni a; Dr. K. Pachhunga, MLA-in a hmanpui.
Dr. K. Pachhunga chuan “Mizo ten Science and technology ah rahbi thar kan kai zel” tiin, Mathematics subject a hlawtlinna chang ten chawimawi an phu thu a sawi. Pathian tih leh taimak chu malsawmna a dawnna a nih thu sawiin, tha leh dika an hriat chu ti zel turin naupangte a chah.
Science & Technology lamah Mizo tan tanlak a tul thu sawiin, “Mathematician leh Scientist kan tlem tulh tulh” a ti a, hemi lama tan la zel turin naupang leh thalaite a chah a. Dr K Pachhunga chuan Mau chu miin fiamthu thawh nan hmang thin mahse, a nuihzathlakloh niin a sawi a. Mau atanga thil chi hrang hrang siam theih awm te sawiin, Mizo scientist-te leh researchers-te tan mau lama hmalakna tur tam tak a la awm thu a sawi bawk.
MISTIC leh Mizoram Mathematics Society (MMS) tangkawpin pawl 5, 8, 10 leh 12 zirlaite tana he ni puala kumtina an buatsaih thin State Level Mathematics Competition-a tithate hnenah chawimawina thuziak leh tangkafai hlan an ni.