MNF party chuan nimin khan Vanapa Hall-ah MNF Exodus Day 52-na an hmanga, thusawitu MNF President Zoramthanga, chief minister ni bawk chuan MNF chu Mizoram tan harsatna su tura Pathianin a din a nih thu a sawi.
Zorama chuan, “Harsatna su turin Pathianin MNF hi a tir atangin a din a, a sut tlangtir thin,” a ti.
Party dang ang an nih ve loh thu sawiin, Mizoram chhanchhuak tura Lalpan a siam a nih angin underground politics harsatna period-ah leh Overground politics-ah pawh president’s rule atangin harsatna tam tak an paltlang tih a sawi.
MNF president chuan, “Covid a leng dawn a, harsatna tinreng a thleng dawn tih hi kan Pathianin a hre vek a, heng hun atan hian MNF hi a dah,” a ti a. Tunah pawh beih tinrengin beihna tawk mah se Pathianin a tung ding ang a, election fight tlangna khawp chakna a pe leh dawn tih a sawi.
Exodus Day an hman chhan sawi fiahin Zorama chuan, “December 16 hi India sipaite tan hnehna ni ropui, an hmelma Pakistan tlawmna ni, ‘Vijay Diwas’ a nih rualin MNF sipaite tan pawh Pakistan sipaite lak atanga chhanchhuahna ni ropui, ‘Exodus Day’ a ni,” a ti.
Exodus Day hmannaah hian inkhawm hruaitu, MNF Sr. Vice President & Dy CM Tawnluia kaihhruaiin martarte sunna hun hman a ni a, Zoramthanga chuan Parva daia ralthuam dahna memorial atana siam lungphun a hawng a. MNF Treasurer K. Vanlalauva’n underground signatory leh MP-te inhmelhriattirna neiin, anni hi thilpek hlan an ni bawk.