Aizawl: Nimin khan School Education Minister Lalchhandama Ralte chuan Tinghmun Middle School Golden Jubilee lawmna Govt. Middle School, Tinghmuna neih chu khuallian niin a hmanpui.
Minister chuan thu sawiin, “Ram hmasawn ni tur chuan a tobul, mihring chherna pawimawh ber chu zirna hi a ni,” a ti.
“Mihring tihhmasawn hmasak hi a pawimawh êm avangin sorkar pawhin a ngai pawimawh a ni,” a ti a. Sorkarin sikul building a sak thar leh repair te, zirtirtu a dah belh dan te a sawi.
“Ram siam thatna hnukpui ber a nih avangin zirnain hmun sang a channaah hmasawnna tluantling a awm thin a ni,” a ti bawk.
Minister chuan hmar tlangdung chu kawngpui pawimawhin a paltlang thuai dawn tih a sawi a. “He tlangdung atanga Bagha panna tur chu NH 306 tia vuah fel a ni tawh a, Manipur panna kawngpui lian tham tak sialna tur sum Rs. vbch 1,500 chu Union Transport Minister Nitin Gadkari-a’n a puang tawh a, hmar tlangdung hi Manipur leh Bagha panna tlangdung a ni thuai dawn a, heng kawngpuite hi hmasawnna hnuk an ni dawn,” a ti bawk.
Minister chuan zirtirtute chu missionary thinlung pua hmangaihna tak tak nena thawk turin a sawm a, zirlaibu piah lamah tualzal nun pawh zirtlak nun nei turin a sawm.
Minister chuan zirlaite pawh nih tum leh thlen chin tur target neia zir turin a fuih a. Zirlaite chu Pathian hre chunga lehkha zir tur leh ruihhlo laka inthiarfihlim turin a sawm bawk.
Minister hian Jubilee lungphun a hawng a, souvenir a tlangzarh bawk.
Lalmalsawma Darngawn, Chairman, Sinlung Hills Council pawhin thu a sawi a, Tinghmun MS kalkawng leh hma a sawn zel dan a sawi a, lawmawm a tih thu a sawi.
Tinghmun Middle School Golden Jubilee lawmnaah hian zirlaiten jubilee hla an sa a, Jubilee Psalm leh malzaite ngaihthlak a ni a, Sinlung Hills Council Chief Executive Member leh Executive Member te, he school-a lo thawk tawh te, zir chhuak tawh te, tuna zirlai leh zirtirtute, khawtlang hruaitute leh khawtlang mipui an kalkhawm a ni