Myanmar sipai roreltute chuan mipuiin anmahni duh lohna an lantir chhunzawm mek zel laiin inthlan that an huaihawt dawn thu an sawi nawn leh a, duh lohna lantir chu tawp turin an ngen nawn leh bawk.
Army thupuangtu, Brig Gen Zaw Min Tun chuan inthlanah dik lo tam tak a awm avangin sipaiten thuneihna an chang leh ta tih a sawi a, finfiahna erawh a awm lo.
Eptu hruaitu, Aung San Suu Kyi-i chu thubuai dang an awrh belhtir tih a sawi bawk.
Tar lan tawh thin angin Myanmar-ah hian sipaiten February 1-a mipui sorkar an paih thlak hnuah anmahni duh lohna nasa taka lantir zel a ni.
Tun hnaiah sipaite hi khawpui lian thenkhat khawlaiah inchhawp chhuakin mipui laka chet chhuahna an tan nia ngaih theih tur thil tam tak a thleng.
Sorkar an paih thlak hnua thuthar lakhawmtute an kawmna hmasa berah Zaw Min Tun chuan rei tak sorkar fawng chelhtu tur an ni lo tih sawiin, “Inthlan huaihawt leh niin a chak party-in thuneihna an chang ang,” a ti.
Inthlan an huaihawt tur ni erawh a sawi lo thung.
An khawpui, Nay Pyi Taw-a nimina thuthar lakhawmtute a kawmnaah hian Zaw Min Tun chuan an hren mek, Suu Kyi-i chu thubuai dang siam belhsak a nih thu sawiin, “Natural Disaster Law a bawhchhia nia puh a ni,” a ti.
A hmain Suu Kyi-i hi ram pawn atanga lak luh walkie-talkie kawla puh a ni.
Zaw Min Tun chuan Suu Kyi-i hi a chenna inah ama himna tura dah a nih thu leh nuam takin, hrisel taka a awm thu a sawi.
Thuthar lakhawmtute a kawmnaah hian sorkar duh lohna lantirtute hian tharum nen venhim hna thawktute an bei niin a sawi.
“Police officer pakhat chu dan lova chete avangin a hliam a, a hnuah a thi,” a ti.
Sipai sorkar duh lotu mipui pungkhawmte hi venhim hna thawktute nen hmun eng emaw zatah an innawr a, mipui hnawh darh nan mittui tlakna hlo leh rubber silaimu an hmang.
Mipui zingah hmeichhe pakhat chuan a lu-ah hliam na tak a tuar ve bawk.