Aizawl Traffic Police leh Transport Department Enforcement staff-te’n ‘No Tolerance Drive’ an kalpui mekah ni 6 chhungin lirthei dan bawhchhia 945 an man tawh a, an pawisa chawi tling khawm chu Rs 8,21,400 a tling tawh.
Ngaihhnathiamna tel loa lirthei enfiahna ‘No Tolerance Drive’ hi December ni 12,2021 atang khan kalpui tan a ni a, hemi ni hian lirthei dan bawhchhia 133 an man a, an zinga 80 chuan dan bawhchhiat man an chawi nghal a, pawisa tling khawm chu Rs 1,57,400 a tling.
A ni hnihna December ni 13-ah lirthei dan bawhchhia an man 111 zinga 72 in sum an chawi nghal a, Rs 1,36,500 a tling a. A tuk December ni 14-ah dan bawhchhia 167 an man leh a, sum chawi nghal 134 te sum chawi chu Rs 1,65,000 a tling leh a, December ni 15-ah lirthei 175 man lehin, mi 134 te’n sum an chawi nghal zat chu Rs 1,35,000 a tling a, December ni 16-a dan bawhchhia 136 an man zinga mi 128 te sum chawi chu Rs 1,42,500 a ni a, vawiin (December ni 17)-a dan bawhchhia 223 an man zinga sum chawi nghal 168 te sum chawi chu Rs 85,000 a tling leh a ni.
Ni 6 chhung hian lirthei dan bawhchhia 945 an man a, an zinga 716 te chuan dan bawhchhiat man an chawi tawh a, chung chu a vaiin Rs 8,21,400 a tling tawh a, dan bawhchhia man tawk sum la chawi lo, an document te Traffic police ten an kawl that 229 an awm a ni.
Traffic Police hotute’n THE ZOZAM TIMES an hrilh danin, dan bawhchhia an man zawng zawng zinga 709 lai chu lirthei ke hnih nei chi an ni a, 236 chu lirthei kei li nei chi a ni.
No Tolerance Drive hi kalpui chhunzawm a nih dawn leh dawn loh hi traffic police hotute chuan tun dinhmunah an sawi thei rih lo a,”Sorkar hotute nen kan la sawi ho leh ang chu,” an ti.