Tun thla ni 17-19 chhunga Aizawl Diocese tlawh tura lo kal, Archbishop Leopoldo Girelli, Vatican Ambassador to India-in vawiin khan St. Joseph the Worker Church, Kolasib a tlawh a. Kohhran mipui leh sawm bik mi thenkhatte nen an inkawm.
Archbishop Leopoldo Girelli chuan vawiin hi Pope Francis piancham a nih thu sawiin, Pope Francis thuchhah a ngaihpawimawh zualte a sawi a. Inpumkhatna, induhsaktawnna leh inlungrualna siamtu ni zel tur leh thil siam hrang hrang leh leilung hausaknate dim thiama humhalh a pawimawh zia te a sawi.
Thalai, rawngbawlna lama kal tura inbuatsaih mek te pawh kawmin Archbishop chuan ngun taka ngaihtuahna seng chunga thuthlukna siam thin tur leh rawngbawlna chu biak in pawnah pawh, kawng hrang hranga thawh theih a nih thu a sawi bawk.
Archbishop Leopoldo Girelli hi Bishop Stephen Rotlanga’n a tawiawm a ni.