Aizawl bazar-ah Krismas bazarin mipui an pungkhawm tam thin tawh hle a. COVID19 len hmaa Krismas bazar te aiin kuminah mipui an tam hma a, COVID19 vanga kum hnih chhung Krismas hman mumal theih a nih loh vang te pawh nia ngaih a ni.
Trade & Commerce department hnuaia New Market enkawltu Commerce Wing hotu ten THE ZOZAM TIMES an hrilh danin, kumdang aiin thil bo leh chhar report la dawng tlem rih mahse, thil bo report an dawn belh zel a. Tun thlaah nimin (Dec 19) thleng khan Aizawl Bazara pawisa bo report zat Rs. 38,100 a tling tawh a. Pawisa bakah thil dang bo report engemawzat an dawng tawh a, thenkhat hmuhlet leh a awm bawk.
Kumin January ni 1 atanga December ni 19 thleng khan Aizawl bazar-a pawisa bo report Rs nuai 1 sing 9 leh 570 a tling tawh a, pawisa bak thil dang – purse, document hrang hrang, thawmhnaw leh mobile phone te a awm bawk a, thil bo report zinga zaa 25 vel chu hmuhlet a ni tawh.
Aizawl bazar-a thil bo chhar, market office lama report te chu a neituin a lam hun nghah thin a ni a, ngaihventu awm lo chu a chhartute hnenah pek thin a ni.
Mizoram khaw hrang hrang atangin Krismas bazar turin mipui an fuankhawm tam a, a bikin Aizawl pawn atanga Krismas bazar-a naupang hruai te kumdangah an bo nasat thin avangin kuminah pawh fimkhur leh zual turin Trade & Commerce department hnuaia New Market enkawltu Commerce Wing hotu te chuan naupang hruai te chu an chah a. Rukruk leh an dan siamte zawm lo zawnga che an awm loh na tura aurinna hmanga an au reng thu pawh sawiin, bazar-a kal mipui zingah ipte lo ak fimkhur lo deuh an awm pawhin an duty ten fimkhur tura an hrilh thin thu an sawi bawk.
Bazarah mipui an tam leh tak avangin mipuite chu pawisa dahna bag leh wallet/purse te vawng fimkhur turin an chah a. Kawr leh iptea pawisa dah te fimkhur taka vawn a tul thu leh, naupang leh chinchang hre lo hruai te phei chu an mi hruaite thlahthlam lova veng tha turin an chah a ni.