SIPMIU hnuaia hmalakna – 10 MLD Sewage Treatment Plant leh Sewarage Network chu vawiin khan UD&PA leh PHE changtu, Deputy Chief Minister ni bawk Tawnluia’n a hawng.
Sorkar thuchhuahin a tarlan danin 10MLD Sewage Treatment Plant (STP) hi mihring thli leh tui bawlhhlawh sawngbawlna niin, he project atan hian Rs. vaibelchhe 26.76 sen a ni a, chhungkaw 12,000 ten an hman tangkai theih tura ruahman a ni.
STP hi Aizawl khawpui chhunga Local council 16-in an hman theih tura ruahman a ni a, Local Council/Veng pakua – Ramthar Veng, Ramthar North, Chite Veng, Armed Veng, Armed Veng South, Chhinga Veng (hmun thenkhat), Saron Veng, Bethlehem Veng leh Bethlehem Vengthlang ten an chhawr tangkai mek niin sorkar thuchhuah chuan a tarlang a. Hengte bakah hian veng pasarih – Tuithiang, Aizawl Venglai, Electric Veng, Dawrpui, Zarkawt, Chanmari leh Ramhlun ‘S’ hmun thenkhat te chu a huam theih chinah awmin, rokhawlhna avangin tun dinhmunah chuan huam tel a ni rih lo niin a tarlang bawk.
STP hian 10MLD (liter maktaduai 10) chuang ni khatah a sawngbawl thei a, hei hian chhungkaw 12,000 tan connection a nei thei a ni. Tun dinhmunah hian chhungkaw 4326 in connection an nei tawh a, in 2012 chu thlunzawm a ni tawh a ni tawh niin sorkar thuchhuahin a tarlang.
Sorkar thuchhuahin a tarlan danin STP hi uluk taka enkawl reng ngai leh vil reng ngai a nih avangin senso ngai te chu connection fee leh user charge atanga ruahman tur a ni a. Connection fee leh user charge chu a tul anga sorkarin a ruahman thin tur niin, electric bill leh tui bill ang thova thla kipa bill chawi ngai tur a ni.
SIPMIU Sewage Treatment Plant ve thung hi Chite lui kamah kum 2013 atang khan sak tan niin, zawh fel a ni tawh a. State Investment Programme Management & Implementation Unit (SIPMIU)-in North East Region Capital Cities Development & Implementation Programme (NERCCDIP) hnuaiah Asian Development Bank (ADB) sum hmanga a buatsaih a ni.
Primary & Secondary Sewerage Networks Km 45.95 Sewerage Network (SEW) siam hna chu ruahman sa anga thawh zawh ni lo mahse, ruahman aia tam hnathawh a ni thung niin sorkar thuchhuah chuan a tarlang a. He hnathawh nan hian Rs. vaibelchhe 56.76 sen a nih thu a tarlang bawk.