NEC sum Rs. nuai 1,000 senga I&PR department hnuaia sak mek, I&PR Deptt. office bul ami Lianchhiari Run chu vawiin khan I&PR Minister Lalruatkima’n tlawhin, hna kal mek te a enfiah.
I&PR Minister chuan Lianchhiari Run chhung lam cheina tur leh tul dangte atana sum mamawh dil mek chuangchang pawh I&PR Secrtary HM. Hualsangi leh Planning & programme implementation, Principal adviser-cum-Addl. Secretary Dr. Lalrinchanna leh SRO Jessie leh I& PR Director C. Lalnunkima leh a thawhpuite a sawipui nghal.
Lalruatkima chuan Lianchhiari Run-ah chuan office bakah mipui mamawh – mini theatre, conference hall leh conference room, exhibition space leh lirthei hunna tur te a awm tel thu a sawi a. Parking fee leh hall hmanna atangin he building hi amah inenkawl zo tura ruahman a nih thu a sawi.
NEC-in a ruahmannaah a chhung cheina tur bungrua leh mamawh dangte a tel loh avangin Planning department lamah dil mek a nih thu I&PR Minister chuan a sawi a. A satu contractor te chu sorkar kum kal mek ral hma ngeia sa zo hman turin a ngen.
Sorkar thuchhuahin a tarlan danin, he building sak hna hi zaa 95 vel zawh tawh a ni a. Chawng 7 a sak niin, lirthei ke hih nei 70 vel leh ke li nei 40 vel dah theina tur ruahman a ni a. Mini theatre, Conference hall, Conference room leh Roof top exhibition space te awm tura duan a ni. He project atana sum mamawh zaa 90 chu NEC tum niin, zaa 10 chu state sorkarin a tum thung.