MNF thalai President, MLA ni bawk Dr L Thangmawia’n kum hnih chhung zet COVID19 vanga Krismas leh Kumthar lawm hleihtheih a nih loh hnua dan pangngaia Krismas leh Kumthar lawm theih a ni leh tur chu lawmawm a tih thu sawiin, Zoram mipui zawng zawng he hunpui hi hlim taka hmang turin duhsakna a hlan.
L Thangmawia chuan vawiin khan thuthar thehdarhtute kawmin, he thil hi a sawi a. Mizoram rorel khawla tel, ram hruaitu, Tuirial bialtu MLA Andrew H. Thangliana’n he hunpui thleng zo ve ta lova August ni 17, 2021-a chatuan ram a pan ta erawh pawi an tih thu leh an rilrua a awm reng thu sawiin, a nupui fanaute an tawrhpui thu a sawi.
Kum 2018 inthlanpuia MNF party-in hnehna an chan hnua Zoram hmasawnna tura a theih ang anga sorkar hmalaknate L Thangmawia chuan a sawi a. Kum 2018 MLA inthlan hnua MP (LS) inthlan te, Aizawl Municipal Corporation (AMC), Local Council, Village Council, Lai Autonomous District Council, Chakma Autonomous District Council, Sinlung Hills Council, Sialkal Range Development Council te bakah Aizawl West-I leh Tuirial bial MLA bye election-a MNF party-in hnehna an chan zui avanga lawmawm a tih thu te a sawi.
Kum 2018 kum tawp lama MNF party-in Mizorama rorelna fawng an chelh atanga reiloteah COVID19 avanga kum hnih chhung zet chet hleihtheihloh ni mahse, a theih ang angin sorkarin hmasawnna hna a thawk tih L Thangmawia chuan a sawi a. COVID19 do kawnga kohhran, tlawmngai pawl leh mipuiin sorkar an thlawpnaah lawmthu a sawi bawk.
MNF party-in sorkarna an chan hnua harsatna hrang hrang thleng te sawiin, COVID19 bakah ran pul hri African Swine Fever (ASF), Zoram khawchhak lama lirnghing leh ramri buai te avanga harsatna thleng karah mipuiin sorkar an thlawpna leh tanrualna a lan zel thu sawiin, lawmawm a tih thu L Thangmawia chuan a sawi a. Hripui leng leh harsatna hrang hrang avanga tum ang leh duh anga hna an thawh theih loh avangin Zoram mipuite hriatthiamna a dil bawk a ni.