Mizo zinga Aizawl Bawrhsap ni thei hmasaber P Rohmingthanga chu nizan (December ni 20, 2022) dar 10 khan a boral a, vawiin chhun dar 12-ah Chaltlang, Aizawla an chenna In-ah vui a ni ang.
Kum 86 mi P Rohmingthanga hi kum 1961-ah Indian Administrative Service (IAS) leh Indian Foreign Service (IFS)-ah inziaktling kawpin, IAS a zawm ta zawk a. Kum 1973 – 1976 chhungin Aizawl Bawrhsap niin, Mizo zinga Aizawl Bawrhsap ni thei hmasaber a ni a. Kum 1987 – 1988 chhungin Mizoram Chief Secretary a ni bawk.
Mizo zingah tun thlengin Secretary to the Govt. of India ni thei awmchhun a la ni a. Kum 1993 – 1996 chhungin Ministry of Commerce, Deptt. of Supply Secretarty niin, heta tang hian pension-in a chhuak ta a ni.
Indian National Trust for Art and Cultural Heritage (INTACH) Mizoram Chapter-ah life member niin kum 2010 atangin he pawlah hian Convener a ni ta nghe nghe.
Aizawl Bawrhsap a nih laiin Employment Guarantee Scheme (EGS) Road tam tak hawngin,Mizorama khaw kilkhawr tak tak a tlawh chhuak deuh vek a. Mizoram Union Territory a nih chhoh tirha Education Secretary niin, Mizoram zirna atan nasa taka hmalatu a ni a. Programme leh policy pawimawh tak tak duang chhuakin Mizoramah zirna atana department pawimawh tak tak a hova din a ni a – SCERT, DIET, Polytechnic, Institute of Music & Fine Arts, NEHU Campus, MBSE, State & District Libraries, State Archive leh Sports & Youth Development te hi a hova din an ni.
Chairman, Delhi Agriculture Marketing Board 1989-1992 a nih laiin Azadpur Wholesale Market-a dan lova awm luite a chingfel (clear) vek a. Hei hi a hmaa lo thawk te tih ngam loh a ni. Sumdawngte chu an lawm hle. Heta tanga a insawn dawn pawhin ‘Mi pakhat chiah kan la thlah a, midang kan la thlah ngai lo’ tiin Buddha lim lianpui pein an thlah nghe nghe. Buddha i ang ber mai tiin an ui em em a ni.
A pension hnuah Office leh post pawimawh tak tak la luahin a la chelh chhunzawm a, chungte chu:
1. Election Commissioner for the Union Territories of Andaman and Nicobar Islands, Dadra and Nagar Haveli, Daman and Diu, Lakshadweep, 1996 – 2002.
2. Member, Delimitation Commission of India for Mizoram, 2004 – 2005.
3. Pro-Vice-Chancellor, ICFAI University, Mizoram, 2008 – 2013.
A hna chelh hnuhnunber Pro-Vice-Chancellor, ICFAI University-a a thawh chhung hian nasa takin he University thanlen nan a thawk a, University puitlingah a siam a. He hna a chelh lai hian Mizo thil hlui vawnthat kawngah leh zirna lamah a hun tam zawk a hmang a, chutih rualin Deputy Commissioner leh Development Commissioner a nih lai khan Mizoram-a thil hlui vawnthat kawngah a sulsutu a lo ni tawh bawk.
INTACH pawl atangin Mizoram chhunga thil hlui hlu tak tak kan neih hmun hrang hrang ami lam hawiin hma a la a, a bikin Vangchhe lamah insawrbingin, theihpatawp a chhuahna avangin hriatreng leh chawimawi a hlawh a ni.
Aizawl timawitute zinga mi Assam Rifles Quarter Guard kawta laipui kum 100 chuang awm chu, 1st AR Battalion kum 2003-a Aizawl atanga transfer an nih khan, an ta emaw tiin an la bo daih a, a aiah Laipui dang an dah a. INTACH-in a hova zawng turin Dr. J.V.Hluna leh Dr. Vanlalhruaia an ruat a. Nagaland-ah kalin Tuensang-ah an han hmu a. Nimahsela 1st AR trophy ani tiin an DG hovin tan an lo khawh a. A ni chuan Sipai dah a ni lo, Civil mi Superintendent J. Shakespear-a’n Aizawl timawi tura Waterloo-a an hman laipui a dah a ni tiin Home Ministry, Govt. of India ah Lal Thanhawla nen lehkhain an chhu zuia. Lal Thanhawla nen hetih laia Home Minister P.Chidambaram an hmina. Home Secretary G.K. Pillai a hmu bawk a. Home Ministry-in DIG, Brigadier S.P. Rawat a ngaihdan an zawt a. Ani chuan, P. Rohmingthanga sawi dan zulzuiin Civil Administration in a dah a nih angin Aizawl-a dah turin a rawt a. Home Ministry, Govt. of India-in a pawmpui hnuin DGAR hnenah Mizorama dah turin order an siam ta a. Brigadier S.P. Rawat-a’n a hote a lak tir ta a. May ni 12, 2012 khan Laipui pahnih chu Aizawl atanga lakchhuah leh theih tawh loh turin Lal Thanhawla, CM leh Rohmingthanga, INTACH Convener te chuan Quarter Guard kawtah a rualin an dah nghet ta a ni.
Archaeological Survey of India (ASI) tana thahnemngai taka a thawh avang pawhin ngaihhlut leh hriat a hlawh hle a. Socio-economic leh Culture chungchanga article leh paper tam tak a buatsaih bakah thil hlu laihchhuah (megalith telin) leh a hmun vawnthat kawnga theihpatawp a chhuah avangin hriatreng a hlawh bakah ‘The True Legends Award’ Telegraph-in 2016 khan an hlan nghe nghe.
P. Rohmingthanga hi Selthuama @Lena (L) leh Saihnawli (L) te fa 10 (mipa 6 leh hmeichhe 4) zinga upa ber niin April ni 4, 1936-ah Bualpui(H), Thingsai khaw bulah a piang a. December 16, 1964-ah Laldingliani nen Dawrpui Biak in ah-ah inneiin, fa pathum (mipa 2 leh hmeichhe 1) an nei a, tu 6 an nei bawk.