Aizawl Mayor Lalrinenga Sailo-in vawiin khan thuthar thehdarhtute kawmin, Shop licensing regulation chu sumdawnna kawnga inchimralna thlen thei a nih loh thu a sawi.
Aizawl Mayor chuan Aizawl khawpui chhunga sumdawnna kalpui zawng zawngin AMC atangin phalna an neih vek a tul thu sawiin, mi 7111 hnenah permit an pek tawh thu leh chung zinga 255 te chu hnamdang an nih thu a sawi a. Hnamdang shop license an pek te chu Mizorama kum tam tak lo awm tawh Gorkhali te an nih thu a sawi.
Shop licensing regulation chu sumdawnna kawnga inchimralna thlen thei a ni lo nia sawiin, Aizawl Mayor chuan “ram leilung fa, an hminga permit an neih hnamdang hawh tira, sumdawnna atana hman tir tu te chu sumdawnna kawnga inchimralna thlentu an ni zawk”, a ti.
Aizawl Mayor chuan an hmalakna hrang hrang sawiin, lei laih khuahkhirhna dan site development & slope modification regulations chu khauh taka an kenkawh thute, lei laih dilna 1718 an dawn tawh thu te, mi 1569 hnenah phalna an pek tawh thu leh he dan bawnchhia mi 9 te chu Rs. 5,000 zel chawi tira hrem an nih tawh thu a sawi a. AMC building regulations zawm lova in sa man te chu thiah then tir emaw phal chin anga siamthat tir an nih thu te, kum khat chhungin he dan hnuaia in sak phalna 2,000 atanga 3,000 vel pekchhuah thin a nih thu te a sawi.
Sawiselna karah mipuin chhiah pek a tulna an hria tih Aizawl Mayor chuan sawiin, mipuiin property tax an pek that thu a sawi a. Property tax tlingkhawm chu khawtlkang tana tangkai taka hman tura councillor ten zaa 80 an sem chhuah leh thin thu sawiin, a dang zaa 5 chu local council te hnenah pek a nih thu a sawi bawk.