December 21, 2022 zan khan Behliangchhip Salvation Army Thalaite buatsaihin Behliangchhip kawnah Riangvaite pualin Coffee Nite hman a ni. He hun hi Hachhek bialtu MLA Lalrindika Ralte chu Father of the Nite ni in a hmanpui.
Lalrindika Ralte chuan, Behliangchhip SAY ten Riangvaite puala Christmas hlim taka an hman theihna tura hun an buatsaih chu lawmawm a tih thu sawiin, Coffee nite hmanga kalkhawmte chu an kal khawm chhan ngaihtuahna thuk zawka hman a tul a ti.
Lalrindika Ralte chuan, Mizo nih a, Kristian nih hi a hlutzia leh pawimawh sawiin, Mizo hnam hmalam zahawmna humhim tura Mipa kan pawimawh. Mizo mipa niha Kristian nih hi nih ve mai mai a ni lo. Kan mawhphurhna hriat a ngai. Chhungkua leh khawtlang hmalam hi Mizo mipa mawgphurhna a ni a, hnam a chhiat a thata mawhphurtu, he hnam tana tun aia nasa zawka in pek a ngai, a ti.
Pathianin siam chhan hi ngaihtuah chu midang tan, mi harsa zawk leh riangvai fate tan a ni, tih sawiin, mihringte hian hlimna kan duh a, hlimna kan zawng a, lungawi duhin lungawina kan zawng a. Hlimna leh lungawina zawng tam takin anmahni siamtu Pathian siam chhan anga an awm loh avangin a tawpna vakvai thin. Hlimna leh lungawina hi a zawna zawn chi a ni lo, hlimna leh lungawina tluantling chu Pathianin min din leh min siam chhan tihhlawhtlin a ni, a ti a. Jampui tlangdung hnam dang kara Pathianin Mizo hnam a dah chu chhan tha tak a nei tih sawiin, hnam dang kara Mizo hnam zahawmna leh Kristianna meichher chhi eng turin Pathianin he Jampui tlangdung hnam dang karah hian min dah a ni ang, tih ringin i vawng reng ang u, a ti bawk.
Behliangchhip Salvation Army Thalaite te hian Christmas dawn a piang heng mi harsa zawk te tan hian hun hmangin tanpuina an pe thin a. Jampui tlangdunga Mizo khua ten an ngaihluin an ngaipawimawh hle a. Christmas inbuatsaihna hmatawngah an hmang thin a ni.