- Lalvansanga Pautu
“Ka pi, no khat leh aw..”
“Thla tir lama i ba pawh i la pe lo ania”
“Mas’ hma chuan ka pe fel vek ang che.”
“Naktip mai alawm Krismas te chu, min pe hman ngut lo ang e.”
A harh chhuak zawk a, “Naktip mai maw Krismas!?” a han ti ang he haw a. Tumah be lum lam tawh chuang lo leh a no khat dil belh pawh ngaihtuah chang tawh lo chuan a tho a, ‘Naupang water pistol lei ka ngai’ tih pahin a chhuak nghal a. A chhuah hnu lawk chuan kawtthlerah motor insu ri bur a awm a, an tlan khawm tak tak a, nikhaw hre lova lo tlu ngat pa chu naktip mai Krismas a nih hre thartu, zu inna hmun atanga chhuak hlim hlawt kha a ni. A tul ang an buaipui a, damdawi in lam an thlen hnu thleng pawh chuan nikhaw hre lovin a la awm a, harhchhuak leh tur a awm lo zui ta.
Naupang kum 5 mi Buangpuia chu engmah hre thiam rual a la ni lo a, Krismas urlawk ni tak mai a chhiat an tawk pawh chu a ngaihna a la hre thiam hek lo. A nu chu a pa ruang kil chuan a tap keuh keuh reng a, a nu tah chhan lah chu a hrethiam lo a, Krismas ni a hak tur a kawr mawi neih ve te chu a ha tih chu a inhria, a thawmhnaw mawi neih ang ang chu a inbel kim ve chuan a inhria a, mah se an chhungkua chuan hlimna an nei kim si lo. Chungte hlei hlei chu a nu tahchhan te pawh a ni tih hrethiam rual lah a ni bawk si lo.
A pa chuan Krismas ah an inkhawm ang a, a thianpa Zuitea ta ang chiah water pistol leisak a tum thu a sawi a, chu chu Krismas a nghahhlelh chhan ber pakhat a ni bawk. A pa nen chuan thil tam tak sawi thin mah se, leitur hrang hrang an sawi dun zinga a rilrua awm reng chu water pistol chu a ni. Mahse, Krismas ah a dawng thei dawn ta si lo!
A nu chuan Buangpuia chu kuahin a tap hawm hawm reng a, a pa chuan zu in ve thin mahse an hmangaih reng a, an tana a hnathawhna zawng zawngte chu an hrereng a, a awm loh hnua an nufa awm dan tur mawlh chu a nu mang ti ang zualtu pawh a ni. Mahse, Buangpuia chuan engmah a la hrethiam ve si lo. Water pistol chu a rilruah a awm reng a.
A pa ruang an thlah liam ni tlai lam a ni a, mi tam zawk chu Krismas boruakin a chenchilh tan a, an theih ang angin an urlawk a, Buangpuia te nufa erawh chu an la chawmawlh a, an la pangngai lo a, an thlah liam tak an pa chuan an ngaihtuahna zawng zawng a la luah a, kir tur a awm tawh lo tih hrereng chungin a lo haw leh mai an beisei a, mahse beiseina beidawng mai erawh a ni si.
Zanriah kil a hun dawn a, Buangpuia chuan a nu hnenah, “Anu, apa khan Zuitea ta ang water pistol ka leisak ang che min ti a,” a ti reuh a. A nu mittui a tla leh ta.
An nufa awmna atanga hla lo teah chuan Buangpuia thianpa Zuitea pa a lo awm reng a, a sawi chu a rawn hre pha hman a, a mittui a hnam sawk a. Ngawirengin a haw a, a fapa Zuitea kiangah kal nghalin, water pistol bakah Krismas thilpek pe turin a fapa leh a nupui chu a hrilh a, bazar lamah a hoin an kal a. Naupang lawm chi hrang hrang bakah water pistol thlengin an lei a. Zuitea pawh a hlim ve hle.
Krismas urlawk zan a ni a, lusun in lamah thalai rual an kalkhawm a, an tin hnu chuan mutna te an rem a, Buangpuia chuan lainattu a ngah hle mai. A nu lah chu a la vai ruai reng bawk si. Naupang tan chuan dawhthlak dawhnate an siam a, Buangpuia pawh engmah hrethiam lo chuan hlim deuhin a muhil ve ta siai siai a, a nu tan tahna a ni leh ta!
Krismas tuk zing a ni a, kawtthler tinah chuan naupang zing tho ri nak nak thawm a awm reng a, an dawhthlak dawhte an en a, a thenin kawt laiah an infiampui nghal tak tak hlawm a. Buangpuia pawh a rawn harh ve ta.
A lu chunga thil awm chu a han en a, water pistol a hmu nawlh mai. Chubakah thil dang chi hrang hrang, ei chi leh in awm lemna chi hrang hrang a awm bawk. A hlim hle mai a, a ching let nghal thuai thuai a, a duh zawng hlir niin a hria a, a bula mu a nu chu a kaitho a. A hlim tih a hmelah a hriat hle. A nu erawh a harh rualin a mittui a tla leh a. A fapa chu a hlim poh leh a mittui ti tlatu a ni zel ta si! Lehkha pakhat hi a lo inzep tel a,
“Buangpui, a zavai hian i ta vek tur aw, water pistol pawh a tel e. – I pa”
A nu chuan Buangpuia chu a kuah a, harsa ti tak chungin a tawngtai a, a tawngtai khatzia a ngaihtuah chhuak tel a, a tawngtai lai mek chuan Pathian chu lo hnai ta riauin a hre bawk a, Krismas tuk tak maiah chuan Pathian chuan an inchhungah hna a rawn thawk a, remna leh muanna a rawn thleng ta. Thlamuanna sawifiah theih loh chuan kiansan a hnekin a chenchilh zui ta reng a.
“Awmlai vei leh lusun fate chantawk hi dawn ve teh,
Hnutiang mual liam hnu ngaiin an tap e.”