Court of special judge (Prevention of Corruption Act)-in Serkhan – Bagha road siamna sum tihchingpen thubuaia court-in thiamloh a chantir PWD E-in-C hlui Liansanga leh E-in-C hlui dang Lianchungnunga te High Court-a an zualkona chu High Court-in ngaihtuah turin a pawmsak.
High Court Judge Justice Marli Vankung chuan Engineer pahnih te chu court-in an chungthu a rem danah lungawi lovin High Court-ah an zualkova, an zualkona chu ngaihtuah tura pawm a ni” tiin, court-in hremna a lo puan tawh pawh ngaihtuah that leh a nih dawn avanga lek kawh rih a nih loh tur thu leh an thubuai chinfel hma bail an dilna pawmsak a nih thu a sawi.
Special court (Prevention of Corruption Act) thutlukna thiah a nih leh nih loh zawhna chu thiah a nih rih loh thuin Justice Marli Vankung chuan a chhang a. “An zualkona pawm a ni chauh a, hearing pawh neih a la ni lo, case chu zirchian chhoha, la ngaihtuah tura pawma ziahluh chauh a ni” a ti a. Thubuai ngaihtuah that leh a nih chhunga court hmasain hremna a lo pek tawh lek kawh rih loh (suspend) chu kalphung pangngai a nih thu a sawi bawk.