Mizoram Police-in Krismas vuakvetah thubuai 36 an ziak lut a, rukruk leh inrawk thubuai a tam ber.
THE ZOZAM TIMES zawhna chhangin Deputy Inspector General of Police (Headquarters) Lalbiakthanga Khiangte chuan, December ni 23-27 inkar chhungin Mizoram puma police station hrang hranga thubuai ziah luh chu 36 chauh a awm thu a sawi.
DIG (Headquarters) sawi danin, Aizawl district-ah thubuai ziah luh a tam ber a, 20 ziah luh a ni a, a bak district dang Champhai-ah thubuai 1, Kolasib-ah 3, Serchhip-ah 1, Lawngtlai-ah 1, Mamit-ah 3, Khawzawl-ah 1 leh Hnathial-ah thubuai 3 ziah luh a ni a, Saitual district police in thubuai ziah luh an nei lo.
Thubuai 36 an ziah luh zinga tam ber chu rukruk,inrawk thubuai a ni a, 20 ziah luh a ni a. A bak chu thihna khawpa in khawih/ in ti na thubuai, in bum thubuai, lirthei hlauhawm taka khalh, zu khapna dan bawhchhiatna, sorkar khap halpuah leh a khaihhnawih ti lui thubuai te a ni.
Lalbiakthanga Khiangte chuan, Mizoram puma Police in thubuai an ziah luh tlem dan atanga thlirin kum 2022 krismas chu Mizoramah boruak muanawm taka hman a nih thu a sawi a, hei hi Police te hmalakna bakah tlawmngai pawl hrang hrangte tanrualna rah chhuah a nih thu a sawi.
DIG (Headquarters) chuan krismas vuakvetah khan halpuah leh a kaihhnawih khapna thupek chu zawm a hlawh thawkhat nia an ngaih thu a sawi rualin kum hlui thlah a, kum thar hmuahnaah pawh sorkar khap thil ti lo turin mipui an ngen tih a sawi.
“Kum 2009-2012 chhung khan halpuah hal lo in kum hlui kan thlah a, kum thar kha kan hmuak thei tawh a, a hnu lamah hian khap hian awmzia a nei lo ta deuh,” a ti a, kumin ah erawh halpuah tel loa kum hlui thlah a, kum thar hmuak thleng turin Zoram mipui an ngen tih a sawi a ni.